har shajar ke tain hota hai samar se paiwand

har shajar ke ta.iiñ hotā hai samar se paivand

aah ko kyuuñ nahīñ hotā hai asar se paivand

dekhnā zor hī gāñThā hai dil-e-yār se dil

sañg-o-shīshe ko kiyā hai maiñ hunar se paivand

mizha-e-ḳhūn-e-dil ālūda pa ye hai qatra-e-ashk

yuuñ hai jyuuñ shāḳh ho marjāñ kī guhar se paivand

mil rahā hai tire aariz se ḳhat-e-mūrcha ye

jaise ā.īne ke jauhar ho jigar se paivand

sozish-e-ashk se ma.alūm ye hotā hai mujhe

qatra-e-āb bhī hotā hai sharar se paivand

thaan zarbaft ke hote the jahāñ qat.a 'huzūr'

jin kī poshāk sadā hotī thī zar se paivand

ab phaTā jaama gazī kā nahīñ gar hai bhī koī

tū nikāle ko nikaltā nahīñ ghar se paivand

har shajar ke tain hota hai samar se paiwand

aah ko kyun nahin hota hai asar se paiwand

dekhna zor hi ganTha hai dil-e-yar se dil

sang-o-shishe ko kiya hai main hunar se paiwand

mizha-e-KHun-e-dil aaluda pa ye hai qatra-e-ashk

yun hai jyun shaKH ho marjaan ki guhar se paiwand

mil raha hai tere aariz se KHat-e-murcha ye

jaise aaine ke jauhar ho jigar se paiwand

sozish-e-ashk se malum ye hota hai mujhe

qatra-e-ab bhi hota hai sharar se paiwand

than zarbaft ke hote the jahan qata 'huzur'

jin ki poshak sada hoti thi zar se paiwand

ab phaTa jama gazi ka nahin gar hai bhi koi

tu nikale ko nikalta nahin ghar se paiwand