har shaKHs is hujum mein tanha dikhai de

har shaḳhs is hujūm meñ tanhā dikhā.ī de

duniyā bhī ik ajiib tamāshā dikhā.ī de

ik umr qat-e-vādī-e-shab meñ guzar ga.ī

ab to kahīñ sahar kā ujālā dikhā.ī de

ai mauja-e-sarāb-e-tamannā sitam na kar

sahrā hī sāmne hai to sahrā dikhā.ī de

maiñ bhī chalā to pyaas bujhāne ko thā magar

sāhil ko dekhtā huuñ ki pyāsā dikhā.ī de

alfāz ḳhatm hoñ to mile rishta-e-ḳhayāl

ye gard baiTh jaa.e to rasta dikhā.ī de

kaun apnā aks dekh ke hairāñ palaT gayā

chehra ye mauj mauj meñ kis kā dikhā.ī de

tū munkir-e-vafā hai tujhe kyā dikhā.ūñ dil

ġham sho.ala-e-nihāñ hai bhalā kyā dikhā.ī de

har shab dar-e-ḳhayāl pe Thahre vo ek chaap

har shab fasīl-e-dil pe vo chehra dikhā.ī de

lab-bastagī se aur khile ġhuncha-e-sadā

vo chup rahe to aur bhī goyā dikhā.ī de

'aslam' ġharīb-e-shahr-e-suḳhan hai kabhī mileñ

kahte haiñ aadmī to bhalā sā dikhā.ī de

har shaKHs is hujum mein tanha dikhai de

duniya bhi ek ajib tamasha dikhai de

ek umr qat-e-wadi-e-shab mein guzar gai

ab to kahin sahar ka ujala dikhai de

ai mauja-e-sarab-e-tamanna sitam na kar

sahra hi samne hai to sahra dikhai de

main bhi chala to pyas bujhane ko tha magar

sahil ko dekhta hun ki pyasa dikhai de

alfaz KHatm hon to mile rishta-e-KHayal

ye gard baiTh jae to rasta dikhai de

kaun apna aks dekh ke hairan palaT gaya

chehra ye mauj mauj mein kis ka dikhai de

tu munkir-e-wafa hai tujhe kya dikhaun dil

gham shoala-e-nihan hai bhala kya dikhai de

har shab dar-e-KHayal pe Thahre wo ek chap

har shab fasil-e-dil pe wo chehra dikhai de

lab-bastagi se aur khile ghuncha-e-sada

wo chup rahe to aur bhi goya dikhai de

'aslam' gharib-e-shahr-e-suKHan hai kabhi milen

kahte hain aadmi to bhala sa dikhai de