har waqt satata hai sudhar kyun nahin jata

har vaqt satātā hai sudhar kyuuñ nahīñ jaatā

vo soch ke parde se utar kyuuñ nahīñ jaatā

kuchh log mohalle ke yahī soch rahe haiñ

gar hosh pe qaa.em huuñ to ghar kyuuñ nahīñ jaatā

jis samt ravāñ haiñ ye dhuāñ dhuul musāfir

us samt mirā zauq-e-safar kyuuñ nahīñ jaatā

har ahd-e-mohabbat pe pashemāñ hai vo āḳhir

kyuuñ uzr tarāshe hai mukar kyuuñ nahīñ jaatā

ik ḳhauf sā dushman kī safoñ pe hai musallat

sar kaaT chuke haiñ to maiñ mar kyuuñ nahīñ jaatā

aflāk se aa.ī thī nidā kaun khaḌā hai

gardan bhī kaTī hai to bikhar kyoñ nahīñ jaatā

zinda hai agar zindagī ne phuul bichhā.e

marnā hai to phir maut kā Dar kyuuñ nahīñ jaatā

kyuuñ yaad kī chaukhaT pe sar-e-ām khaḌā hai

us ḳhālī makāñ se tū guzar kyoñ nahīñ jaatā

maanā ki tū rakhtā hai ajab ek udāsī

us bahr-e-aziyyat se bikhar kyoñ nahīñ jaatā

ye hijr simaTtā hī hijr phailtā jaa.e

ḳhairāt se terī ye asar kyoñ nahīñ jaatā

tanhā to nahīñ ziist kī rāhoñ meñ ḳhalīl ab

phir us kā muqaddar bhī sañvar kyuuñ nahīñ jaatā

har waqt satata hai sudhar kyun nahin jata

wo soch ke parde se utar kyun nahin jata

kuchh log mohalle ke yahi soch rahe hain

gar hosh pe qaem hun to ghar kyun nahin jata

jis samt rawan hain ye dhuan dhul musafir

us samt mera zauq-e-safar kyun nahin jata

har ahd-e-mohabbat pe pasheman hai wo aaKHir

kyun uzr tarashe hai mukar kyun nahin jata

ek KHauf sa dushman ki safon pe hai musallat

sar kaT chuke hain to main mar kyun nahin jata

aflak se aai thi nida kaun khaDa hai

gardan bhi kaTi hai to bikhar kyon nahin jata

zinda hai agar zindagi ne phul bichhae

marna hai to phir maut ka Dar kyun nahin jata

kyun yaad ki chaukhaT pe sar-e-am khaDa hai

us KHali makan se tu guzar kyon nahin jata

mana ki tu rakhta hai ajab ek udasi

us bahr-e-aziyyat se bikhar kyon nahin jata

ye hijr simaTta hi hijr phailta jae

KHairaat se teri ye asar kyon nahin jata

tanha to nahin zist ki rahon mein KHalil ab

phir us ka muqaddar bhi sanwar kyun nahin jata