haram mein muddaton DhunDa shiwalon mein phira barson

haram meñ muddatoñ DhūñDā shivāloñ meñ phirā barsoñ

talāsh-e-yār meñ bhaTkā kiyā maiñ bār-hā barsoñ

mahīnoñ haath joḌe kī ḳhushāmad bār-hā barsoñ

inheñ jhagḌoñ meñ mujh ko ho ga.e ai bevafā barsoñ

ma.āz-allāh is āzurdagī kā kyā Thikāna hai

jo pūchhā yaar se kab tak na bologe kahā barsoñ

ġhanīmat jaan jo din zindagī ke aish meñ guzreñ

kisī kā bhī nahīñ rahtā zamāna ek sā barsoñ

vahī ḳhūn-e-shahīd-e-nāz ab barbād hotā hai

rahā ban kar jo tere haath meñ rañg-e-hinā barsoñ

hamārī be-qarārī kā zarā tum ko na dhyān aayā

mahīnoñ muntazir rakkhā dikhāyā rāstā barsoñ

zamāne meñ hamesha har mahīne chāñd hotā hai

tirā jalva nazar aatā nahīñ ai mah-laqā barsoñ

vahīñ par le chalī be-tābi-e-dil vāh-rī qismat

phirā kī sar paTaktī jis jagah merī duā barsoñ

adā ho shukr kyūñ-kar be-kasī o nā-umīdī kā

rahī haiñ saath furqat meñ yahī do āshnā barsoñ

na aayā ek din bhī vo but-e-be-rahm ai 'jauhar'

uThā kar haath ka.abe kī taraf māñgī duā barsoñ

haram mein muddaton DhunDa shiwalon mein phira barson

talash-e-yar mein bhaTka kiya main bar-ha barson

mahinon hath joDe ki KHushamad bar-ha barson

inhen jhagDon mein mujh ko ho gae ai bewafa barson

maaz-allah is aazurdagi ka kya Thikana hai

jo puchha yar se kab tak na bologe kaha barson

ghanimat jaan jo din zindagi ke aish mein guzren

kisi ka bhi nahin rahta zamana ek sa barson

wahi KHun-e-shahid-e-naz ab barbaad hota hai

raha ban kar jo tere hath mein rang-e-hina barson

hamari be-qarari ka zara tum ko na dhyan aaya

mahinon muntazir rakkha dikhaya rasta barson

zamane mein hamesha har mahine chand hota hai

tera jalwa nazar aata nahin ai mah-laqa barson

wahin par le chali be-tabi-e-dil wah-ri qismat

phira ki sar paTakti jis jagah meri dua barson

ada ho shukr kyun-kar be-kasi o na-umidi ka

rahi hain sath furqat mein yahi do aashna barson

na aaya ek din bhi wo but-e-be-rahm ai 'jauhar'

uTha kar hath kabe ki taraf mangi dua barson