harf-e-aghaz-e-sada-e-kun-fakan tha aur main

harf-e-āġhāz-e-sadā-e-kun-fakāñ thā aur maiñ

raqs meñ sūraj thā piilā āsmāñ thā aur maiñ

gir ga.ī muñdrī zamīñ kī dhuup ke tālāb maiñ

justujū meñ ik jahān-e-be-nishāñ thā aur maiñ

raushnī ke dā.ere the TūTte bante rahe

lafz kī taulīd kā zarrīñ samāñ thā aur maiñ

ik shuā se chhāñTnā the rañg ḳhushbū zā.iqe

ek pechīda anokhā imtihāñ thā aur meñ

Than gayā thā ik tanāza iizad o iblīs meñ

darmiyāñ kaun aayā aks-e-nā-tavāñ thā aur maiñ

be-yaqīnī aur yaqīñ kī sarhadeñ vāzeh na thiiñ

imtizāj-e-lā-zamān-o-lā-makāñ thā aur maiñ

harf-e-aghaz-e-sada-e-kun-fakan tha aur main

raqs mein suraj tha pila aasman tha aur main

gir gai mundri zamin ki dhup ke talab main

justuju mein ek jahan-e-be-nishan tha aur main

raushni ke daere the TuTte bante rahe

lafz ki taulid ka zarrin saman tha aur main

ek shua se chhanTna the rang KHushbu zaiqe

ek pechida anokha imtihan tha aur mein

Than gaya tha ek tanaza izad o iblis mein

darmiyan kaun aaya aks-e-na-tawan tha aur main

be-yaqini aur yaqin ki sarhaden wazeh na thin

imtizaj-e-la-zaman-o-la-makan tha aur main