harf-e-nairang samajh rang-e-asatir mein aa

harf-e-nairañg samajh rañg-e-asātīr meñ aa

hunar-e-izn-e-karāmat mirī zanjīr meñ aa

maiñ ki ḳhvābīda jazīroñ ke ta.āqub meñ rahūñ

tū ki ik baar kahīñ mauja-e-ta.abīr meñ aa

ḳhvāhisheñ ishq kā e.ajāz nahīñ hotī haiñ

chuum kar māthā kisī zulf-e-girah-gīr meñ aa

dekhā in taaza gulāboñ ko na.ī hairat se

gulshan-e-jism meñ rah halqa-e-tasvīr meñ aa

vaqf kar vaqt-e-mulāqāt mulāqāt andar

dasht ko dasht samajh ḳhāk-e-hama-gīr meñ aa

aks-dar-aks koī aur tamāshā-e-javāz

shīsha-e-dil se nikal hairat-e-dil-gīr meñ aa

masnad-e-ishq pe sultānī nahīñ ho saktī

ijz ke paañv pakaḌ faqr kī jāgīr meñ aa

rauñd kar ruuh kisī jism kā ahvāl samajh

chhoḌ de asl-e-ḳhudī bahr-e-mazāmīr meñ aa

saf.ha-e-ḳhvāb se uThūñ maiñ suḳhan kī mānind

tū kisī roz mire lafz kī ta.abīr meñ aa

harf-e-nairang samajh rang-e-asatir mein aa

hunar-e-izn-e-karamat meri zanjir mein aa

main ki KHwabida jaziron ke taaqub mein rahun

tu ki ek bar kahin mauja-e-tabir mein aa

KHwahishen ishq ka eajaz nahin hoti hain

chum kar matha kisi zulf-e-girah-gir mein aa

dekha in taza gulabon ko nai hairat se

gulshan-e-jism mein rah halqa-e-taswir mein aa

waqf kar waqt-e-mulaqat mulaqat andar

dasht ko dasht samajh KHak-e-hama-gir mein aa

aks-dar-aks koi aur tamasha-e-jawaz

shisha-e-dil se nikal hairat-e-dil-gir mein aa

masnad-e-ishq pe sultani nahin ho sakti

ijz ke panw pakaD faqr ki jagir mein aa

raund kar ruh kisi jism ka ahwal samajh

chhoD de asl-e-KHudi bahr-e-mazamir mein aa

safha-e-KHwab se uThun main suKHan ki manind

tu kisi roz mere lafz ki tabir mein aa