harim-e-dil se nikal aankh ke sarab mein aa

harīm-e-dil se nikal aañkh ke sarāb meñ aa

mirī tarah kabhī maidān-e-iztirāb meñ aa

payambaroñ kī zabānī kahī sunī ham ne

vo kah rahā thā ki mere bhī intiḳhāb meñ aa

sunā hai aaj amārī falak se utregī

mujhe bhī niiñd gar aa.e to mere ḳhvāb meñ aa

tujhe ḳhudā.ī kā da.avā hai gar to kam se kam

zamīn par koī din rañg-e-bū-turāb meñ aa

abhī haiñ saare savālāt tishna-kām mire

uThā ke kāñdhe pe miinā mire javāb meñ aa

utaar dī haiñ bhañvar meñ bhī kashtiyāñ ham ne

samundaroñ meñ agar hai to is habāb meñ aa

harim-e-dil se nikal aankh ke sarab mein aa

meri tarah kabhi maidan-e-iztirab mein aa

payambaron ki zabani kahi suni hum ne

wo kah raha tha ki mere bhi intiKHab mein aa

suna hai aaj amari falak se utregi

mujhe bhi nind gar aae to mere KHwab mein aa

tujhe KHudai ka dawa hai gar to kam se kam

zamin par koi din rang-e-bu-turab mein aa

abhi hain sare sawalat tishna-kaam mere

uTha ke kandhe pe mina mere jawab mein aa

utar di hain bhanwar mein bhi kashtiyan hum ne

samundaron mein agar hai to is habab mein aa