harim-e-naz kahan aur sar-e-niyaz kahan

harīm-e-nāz kahāñ aur sar-e-niyāz kahāñ

kahāñ kā sajda kise hosh hai namāz kahāñ

mujhe ḳhabar hī nahīñ hai harīm-e-nāz kahāñ

niyāz-mand kahāñ aur be-niyāz kahāñ

paḌī hai kyā use hasrat zadoñ meñ aane kī

ye merī bazm kahāñ aur vo mahv-e-nāz kahāñ

ye maanā husn-e-haqīqat ayaañ majāz meñ hai

magar vo jalva hai ai chashm-e-imtiyāz kahāñ

ilaaj kis kā karegā ye pūchhtā kyā hai

batā.eñ kyā tujhe hai dard chārasāz kahāñ

kabhī to miltī thī hijr-o-visāl meñ lazzat

magar bujhī huī dil meñ vo soz-o-sāz kahāñ

duā.eñ māñgtā hai shaiḳh kyuuñ ma.āz-allāh

ḳhudā kā naam le tauba kā dar hai baaz kahāñ

baḌe maze se guzartī hai bāda-ḳhvāroñ kī

ba-juz sharāb ḳhayāl-e-shab-e-darāz kahāñ

milā vo be-ḳhudī-e-shauq meñ mazā ai 'shauq'

junūn-o-ishq meñ baaqī hai imtiyāz kahāñ

harim-e-naz kahan aur sar-e-niyaz kahan

kahan ka sajda kise hosh hai namaz kahan

mujhe KHabar hi nahin hai harim-e-naz kahan

niyaz-mand kahan aur be-niyaz kahan

paDi hai kya use hasrat zadon mein aane ki

ye meri bazm kahan aur wo mahw-e-naz kahan

ye mana husn-e-haqiqat ayan majaz mein hai

magar wo jalwa hai ai chashm-e-imtiyaz kahan

ilaj kis ka karega ye puchhta kya hai

bataen kya tujhe hai dard chaarasaz kahan

kabhi to milti thi hijr-o-visal mein lazzat

magar bujhi hui dil mein wo soz-o-saz kahan

duaen mangta hai shaiKH kyun maaz-allah

KHuda ka nam le tauba ka dar hai baz kahan

baDe maze se guzarti hai baada-KHwaron ki

ba-juz sharab KHayal-e-shab-e-daraaz kahan

mila wo be-KHudi-e-shauq mein maza ai 'shauq'

junun-o-ishq mein baqi hai imtiyaz kahan