hashmat-andam ye ek tarz-e-faramoshi hai

hashmat-andām ye ik tarz-e-farāmoshī hai

merī vahshat meñ izāfa tirī ḳhāmoshī hai

peshtar ḳhvāb ke ik ḳhvāb-e-digar hai paiham

sar-ba-sar koī nahīñ hai gahe sargoshī hai

duur ik dhund hai aur dhund se thoḌā aage

baaġh hai baaġh meñ tū hai tirī sargoshī hai

vo badan atlas-o-kamḳhvāb meñ poshīda huā

husn-e-nazzāra kuchh aisā hai ki madhoshī hai

raat har rang meñ tafhīm kā lamha hai mujhe

sub.h kī pahlī kiran bā'is-e-jāñ-koshī hai

go ki maiñ chāk-garebāñ nazar aatā huuñ tujhe

chashm-e-'ushshāq agar ho to ye ḳhush-poshī hai

hashmat-andam ye ek tarz-e-faramoshi hai

meri wahshat mein izafa teri KHamoshi hai

peshtar KHwab ke ek KHwab-e-digar hai paiham

sar-ba-sar koi nahin hai gahe sargoshi hai

dur ek dhund hai aur dhund se thoDa aage

bagh hai bagh mein tu hai teri sargoshi hai

wo badan atlas-o-kamKHwab mein poshida hua

husn-e-nazzara kuchh aisa hai ki madhoshi hai

raat har rang mein tafhim ka lamha hai mujhe

subh ki pahli kiran ba'is-e-jaan-koshi hai

go ki main chaak-gareban nazar aata hun tujhe

chashm-e-'ushshaq agar ho to ye KHush-poshi hai