hashr tak yan dil shakeba chahiye

hashr tak yaañ dil shakebā chāhiye

kab mileñ dilbar se dekhā chāhiye

hai tajallī bhī naqāb-e-rū-e-yār

us ko kin āñkhoñ se dekhā chāhiye

ġhair-mumkin hai na ho tāsīr-e-ġham

hāl-e-dil phir us ko likkhā chāhiye

hai dil-afgāroñ kī dildārī zarūr

gar nahīñ ulfat madārā chāhiye

hai kuchh ik baaqī ḳhalish ummīd kī

ye bhī miT jaa.e to phir kyā chāhiye

dostoñ kī bhī na ho parvā jise

be-niyāzī us kī dekhā chāhiye

bhā ga.e haiñ aap ke andāz o naaz

kījiye iġhmāz jitnā chāhiye

shaiḳh hai in kī nigah jaadū bharī

sohbat-e-rindāñ se bachnā chāhiye

lag ga.ī chup 'hālī'-e-ranjūr ko

haal is kā kis se pūchhā chāhiye

hashr tak yan dil shakeba chahiye

kab milen dilbar se dekha chahiye

hai tajalli bhi naqab-e-ru-e-yar

us ko kin aankhon se dekha chahiye

ghair-mumkin hai na ho tasir-e-gham

haal-e-dil phir us ko likkha chahiye

hai dil-afgaron ki dildari zarur

gar nahin ulfat madara chahiye

hai kuchh ek baqi KHalish ummid ki

ye bhi miT jae to phir kya chahiye

doston ki bhi na ho parwa jise

be-niyazi us ki dekha chahiye

bha gae hain aap ke andaz o naz

kijiye ighmaz jitna chahiye

shaiKH hai in ki nigah jadu bhari

sohbat-e-rindan se bachna chahiye

lag gai chup 'haali'-e-ranjur ko

haal is ka kis se puchha chahiye