hasin dimagh mile jagta shuur mile

hasīñ dimāġh mile jāgtā shu.ūr mile

ḳhudā kare ki tujhe rāste meñ nuur mile

bahut hai sāya-e-bedār ḳhalvat-e-ġham kā

ki ḳhalvatoñ ke amiiñ be-ḳhudī meñ chuur mile

yahī jatan hai ki taqdīr sar-nigūñ na rahe

use bhī is nigah-e-nāz kā ġhurūr mile

hasīn-tar ho zamāna jamīl-tar ho hayāt

agar lagan na lage ḳhaak phir surūr mile

unheñ nigāh kī āġhosh meñ basāyā thā

khulī nigāh to vo zindagī se duur mile

vo jin ko tere taġhāful ne kar diyā mujrim

mirī nazar ko vahī log be-qusūr mile

maiñ ḳhud hī dard se dāman bachā ke guzrā huuñ

vagarna ziist ko parvāz-e-ġham zarūr mile

hasin dimagh mile jagta shuur mile

KHuda kare ki tujhe raste mein nur mile

bahut hai saya-e-bedar KHalwat-e-gham ka

ki KHalwaton ke amin be-KHudi mein chur mile

yahi jatan hai ki taqdir sar-nigun na rahe

use bhi is nigah-e-naz ka ghurur mile

hasin-tar ho zamana jamil-tar ho hayat

agar lagan na lage KHak phir surur mile

unhen nigah ki aaghosh mein basaya tha

khuli nigah to wo zindagi se dur mile

wo jin ko tere taghaful ne kar diya mujrim

meri nazar ko wahi log be-qusur mile

main KHud hi dard se daman bacha ke guzra hun

wagarna zist ko parwaz-e-gham zarur mile