hasin hai shahr to ujlat mein kyun guzar jaen

hasīñ hai shahr to ujlat meñ kyuuñ guzar jaa.eñ

junūn-e-shauq use bhī nihāl kar jaa.eñ

ye aur baat ki ham ko nazar nahīñ aa.e

magar vo saath hī rahtā hai ham jidhar jaa.eñ

hayāt-e-ishq kā maqsūd ban ga.ī āḳhir

ye aarzū ki tirā naam le ke mar jaa.eñ

ye rāh-e-ishq hai āḳhir koī mazāq nahīñ

sa.ūbatoñ se jo ghabrā ga.e hoñ ghar jaa.eñ

pahuñch ke manzil-e-maqsūd par hī dam leñge

ki chal paḌe haiñ to kis muñh se lauT kar jaa.eñ

hasin hai shahr to ujlat mein kyun guzar jaen

junun-e-shauq use bhi nihaal kar jaen

ye aur baat ki hum ko nazar nahin aae

magar wo sath hi rahta hai hum jidhar jaen

hayat-e-ishq ka maqsud ban gai aaKHir

ye aarzu ki tera nam le ke mar jaen

ye rah-e-ishq hai aaKHir koi mazaq nahin

saubaton se jo ghabra gae hon ghar jaen

pahunch ke manzil-e-maqsud par hi dam lenge

ki chal paDe hain to kis munh se lauT kar jaen