hasin KHwabon ki mahfil sajaana bhul gaya

hasīn ḳhvāboñ kī mahfil sajānā bhuul gayā

mile vo ranj ki maiñ muskurānā bhuul gayā

charāġhāñ maiñ ne kiyā saare shahr meñ lekin

ḳhud apne ghar kā añdherā miTānā bhuul gayā

kahāniyāñ haiñ bahut mere hāfize meñ magar

jo yaad rakhnā thā maiñ vo fasānā bhuul gayā

talāsh-e-zar meñ maiñ phirtā rahā zamāne meñ

jo mere paas thā maiñ vo ḳhazāna bhuul gayā

na jaane kaise dukhoñ se najāt miltī hai

hamāre ghar meñ to ġham aa ke jaanā bhuul gayā

milā jo peḌ parinda utar gayā us par

ba-vaqt-e-shām jab apnā Thikānā bhuul gayā

kisī ke lab pe nahīñ mere dard ke qisse

to kyā 'kamāl' mujhe ye zamāna bhuul gayā

hasin KHwabon ki mahfil sajaana bhul gaya

mile wo ranj ki main muskurana bhul gaya

charaghan main ne kiya sare shahr mein lekin

KHud apne ghar ka andhera miTana bhul gaya

kahaniyan hain bahut mere hafize mein magar

jo yaad rakhna tha main wo fasana bhul gaya

talash-e-zar mein main phirta raha zamane mein

jo mere pas tha main wo KHazana bhul gaya

na jaane kaise dukhon se najat milti hai

hamare ghar mein to gham aa ke jaana bhul gaya

mila jo peD parinda utar gaya us par

ba-waqt-e-sham jab apna Thikana bhul gaya

kisi ke lab pe nahin mere dard ke qisse

to kya 'kamal' mujhe ye zamana bhul gaya