hasin naghma-sarao! bahaar ke din hain

hasīn naġhma-sarāo! bahār ke din haiñ

laboñ kī jot jalāo! bahār ke din haiñ

takallufāt kā mausam guzar gayā sāhab!

naqāb ruḳh se uThāo bahār ke din haiñ

guloñ kī sej to tauhīn hai hasīnoñ kī

diloñ kī sej bichhāo bahār ke din haiñ

bahār biit ga.ī to tumhārī kyā izzat

sitam-zarīf ghaTāo! bahār ke din haiñ

hai umr-e-rafta se parḳhāsh kyā bhalā ham ko

qarīb hai to bulāo! bahār ke din haiñ

muġhanniyo! tumheñ kahte haiñ hātif-e-rañgīñ

saman-e-baroñ ko jagāo! bahār ke din haiñ

ye añgbīn sī rāteñ baḌī muqaddas haiñ

diloñ ke diip jalāo! bahār ke din haiñ

'adam' ne tauba to kar lī muġhanniyo! lekin

tum us ko raah pe laao bahār ke din haiñ

hasin naghma-sarao! bahaar ke din hain

labon ki jot jalao! bahaar ke din hain

takallufat ka mausam guzar gaya sahab!

naqab ruKH se uThao bahaar ke din hain

gulon ki sej to tauhin hai hasinon ki

dilon ki sej bichhao bahaar ke din hain

bahaar bit gai to tumhaari kya izzat

sitam-zarif ghaTao! bahaar ke din hain

hai umr-e-rafta se parKHash kya bhala hum ko

qarib hai to bulao! bahaar ke din hain

mughanniyo! tumhein kahte hain hatif-e-rangin

saman-e-baron ko jagao! bahaar ke din hain

ye angbin si raaten baDi muqaddas hain

dilon ke dip jalao! bahaar ke din hain

'adam' ne tauba to kar li mughanniyo! lekin

tum us ko rah pe lao bahaar ke din hain