hasr-afrin hai kucha-e-jaanana aaj-kal

hasr-āfrīñ hai kūcha-e-jānāna āj-kal

bahkī huī hai ḳhū-e-muhibbānā āj-kal

phir bik rahī hai jins-e-vafā kauḌiyoñ ke mol

phir har vafā-shi'ār hai begāna āj-kal

phir uTh rahī haiñ dasht-o-bayābāñ kī raunaqeñ

phir har junūñ-farosh hai farzāna āj-kal

phir shola-kār haiñ chamanistān-e-lāla-zār

phir bijliyāñ haiñ raunaq-e-kāshāna āj-kal

phir har junūñ-sarisht ḳhirad se hai bahra-var

phir kho gayā taqaddus-e-vīrāna āj-kal

har dil meñ jalva-rez hai phir jazba-e-ḳhudī

'anqā hai etibār-e-mulūkāna āj-kal

phir miT ga.e diloñ se junūñ-kār valvale

phir be-navā haiñ salma-o-rehāna āj-kal

phir sātgīñ uñDel ke saaqī ne rakh diye

uThtī hai har nigāh harīsāna āj-kal

afsāna ban ga.ī vo raqābat vo chashmakeñ

dast-e-karam hai dast-e-harīsāna āj-kal

'maz.har' hadīs-e-dard hai apnī har ek baat

har ashk-e-ġham hai ġhairat-e-durdāna āj-kal

hasr-afrin hai kucha-e-jaanana aaj-kal

bahki hui hai KHu-e-muhibbana aaj-kal

phir bik rahi hai jins-e-wafa kauDiyon ke mol

phir har wafa-shi'ar hai begana aaj-kal

phir uTh rahi hain dasht-o-bayaban ki raunaqen

phir har junun-farosh hai farzana aaj-kal

phir shola-kar hain chamanistan-e-lala-zar

phir bijliyan hain raunaq-e-kashana aaj-kal

phir har junun-sarisht KHirad se hai bahra-war

phir kho gaya taqaddus-e-virana aaj-kal

har dil mein jalwa-rez hai phir jazba-e-KHudi

'anqa hai etibar-e-mulukana aaj-kal

phir miT gae dilon se junun-kar walwale

phir be-nawa hain salma-o-rehana aaj-kal

phir satgin unDel ke saqi ne rakh diye

uThti hai har nigah harisana aaj-kal

afsana ban gai wo raqabat wo chashmaken

dast-e-karam hai dast-e-harisana aaj-kal

'mazhar' hadis-e-dard hai apni har ek baat

har ashk-e-gham hai ghairat-e-durdana aaj-kal