hasrat-e-ab-o-gil dobara nahin

hasrat-e-āb-o-gil dobāra nahīñ

dekh duniyā nahīñ hamesha nahīñ

sochne kā koī natīja nahīñ

saaya hai e'tibār-e-sāya nahīñ

sāda-kārī ka.ī parat ka.ī rañg

sādgī ik adā-e-sādā nahīñ

achchhe lagte haiñ achchhe log mujhe

jo samajhte haiñ un se parda nahīñ

maiñ kahīñ aur kis tarah jā.ūñ

tū kisī aur ke alāva nahīñ

tujh se bhāge sukūn se bhāge

sar-garāñ haiñ ki dil-girafta nahīñ

raat zanjīr sī qadam-ba-qadam

ek manzil hai koī jaada nahīñ

husn to ho chalā zamāna-shanās

ishq kā bhī koī bharosa nahīñ

sunte haiñ ik jazīra hai ki jahāñ

ye balā-e-havās-e-ḳhamsa nahīñ

ai sitāro kise pukārte ho

is ḳharābe meñ koī zinda nahīñ

chāñdnī kheltī hai paanī se

itnī barsāt hai ki sabza nahīñ

kaise be-dard haiñ ki joḌte haiñ

naram alfāz jin meñ rishta nahīñ

kahīñ ījād mahz be-mafhum

kahīñ mafhūm hai to lahja nahīñ

kahīñ tasvīr nāk-naqshe baġhair

kahīñ dīvār hai darīcha nahīñ

un se kāġhaz meñ jaan kaise paḌe

jin kī āñkhoñ meñ aks-e-tāza nahīñ

dushmanī hai to dushmanī hī sahī

maiñ nahīñ yā dukān-e-shīsha nahīñ

ḳhaak se kis ne uThte dekhī hai

vo qayāmat ki isti.āra nahīñ

kabhī har saañs meñ zamān-o-makāñ

kabhī barsoñ meñ ek lamha nahīñ

bekalī taar kastī jaa.e 'ḳhizāñ'

hasrat-e-āb-o-gil dobāra nahīñ

hasrat-e-ab-o-gil dobara nahin

dekh duniya nahin hamesha nahin

sochne ka koi natija nahin

saya hai e'tibar-e-saya nahin

sada-kari kai parat kai rang

sadgi ek ada-e-sada nahin

achchhe lagte hain achchhe log mujhe

jo samajhte hain un se parda nahin

main kahin aur kis tarah jaun

tu kisi aur ke alawa nahin

tujh se bhage sukun se bhage

sar-garan hain ki dil-girafta nahin

raat zanjir si qadam-ba-qadam

ek manzil hai koi jada nahin

husn to ho chala zamana-shanas

ishq ka bhi koi bharosa nahin

sunte hain ek jazira hai ki jahan

ye bala-e-hawas-e-KHamsa nahin

ai sitaro kise pukarte ho

is KHarabe mein koi zinda nahin

chandni khelti hai pani se

itni barsat hai ki sabza nahin

kaise be-dard hain ki joDte hain

naram alfaz jin mein rishta nahin

kahin ijad mahz be-mafhum

kahin mafhum hai to lahja nahin

kahin taswir nak-naqshe baghair

kahin diwar hai daricha nahin

un se kaghaz mein jaan kaise paDe

jin ki aankhon mein aks-e-taza nahin

dushmani hai to dushmani hi sahi

main nahin ya dukan-e-shisha nahin

KHak se kis ne uThte dekhi hai

wo qayamat ki istiara nahin

kabhi har sans mein zaman-o-makan

kabhi barson mein ek lamha nahin

bekali tar kasti jae 'KHizan'

hasrat-e-ab-o-gil dobara nahin