hasrat-o-ummid ka matam raha

hasrat-o-ummīd kā mātam rahā

ye vo dil hai jo sadā pur-ġham rahā

ik na ik mujh par sadā aalam rahā

maiñ kabhī be-jāñ kabhī be-dam rahā

merī qismat kī kajī kā aks hai

ye jo barham gesu-e-pur-ḳham rahā

vo dil-e-ġham-ghīñ hai merā ġham-pasand

ġham ke jaane kā bhī jis ko ġham rahā

dil ko har-dam ik pareshānī rahī

zulf-e-jānāñ kī tarah barham rahā

vo namak-afshāniyāñ qātil ne kiiñ

zaḳhm-e-dil sharminda-e-marham rahā

baḌhte baḌhte ho gayā nāsūr dil

ḳhuun kā qatra jo dil meñ jam rahā

thā faqat ik ġham madār-e-zindagī

ġham rahā dil meñ to vo bhī kam rahā

girya-o-zārī yahī 'sāqī' rahī

dil kī hasrat kā sadā mātam rahā

hasrat-o-ummid ka matam raha

ye wo dil hai jo sada pur-gham raha

ek na ek mujh par sada aalam raha

main kabhi be-jaan kabhi be-dam raha

meri qismat ki kaji ka aks hai

ye jo barham gesu-e-pur-KHam raha

wo dil-e-gham-ghin hai mera gham-pasand

gham ke jaane ka bhi jis ko gham raha

dil ko har-dam ek pareshani rahi

zulf-e-jaanan ki tarah barham raha

wo namak-afshaniyan qatil ne kin

zaKHm-e-dil sharminda-e-marham raha

baDhte baDhte ho gaya nasur dil

KHun ka qatra jo dil mein jam raha

tha faqat ek gham madar-e-zindagi

gham raha dil mein to wo bhi kam raha

girya-o-zari yahi 'saqi' rahi

dil ki hasrat ka sada matam raha