poshak-e-siyah mein ruKH-e-jaanan nazar aaya

poshak-e-siyah meñ ruḳh-e-jānāñ nazar aayā

shab ko hameñ ḳhurshīd daraḳhshāñ nazar aayā

dekhā na kahīñ kufr na īmāñ nazar aayā

hindū koī paayā na musalmāñ nazar aayā

malbūs-e-siyah meñ ruḳh-e-jānāñ nazar aayā

zulmāt meñ yaañ chashma-e-haivāñ nazar aayā

bāloñ meñ chhupā chehra-e-jānāñ nazar aayā

parda meñ yahāñ kufr ke īmāñ nazar aayā

phir josh-e-junūñ silsila-e-jumbā nazar aayā

phir be-sar-o-sāmānī kā sāmāñ nazar aayā

pariyāñ jise kāñdhe pe uThātī thiiñ hamesha

barbād vo aurañg-e-sulaimāñ nazar aayā

bā.īñ-hama vus.at bhī hai kyā ḳhvān-e-falak-tañg

āsūda na us kā koī mehmāñ nazar aayā

āñkhoñ ke tale phir gayā vo āhū-e-shahrī

jañgal meñ jo āhū-e-bayābāñ nazar aayā

majma.a meñ raqīboñ ke khulā thā tirā joḌā

kal raat ajab ḳhvāb-e-pareshāñ nazar aayā

jis dasht meñ phūTe haiñ mire ābla-pā

kosoñ vahī sarsabz-e-nīstāñ nazar aayā

tā-sāl-e-digar mai ki ḳhurd zinda ki maañd

māh-e-ramzān sāqī-e-daurāñ nazar aayā

dīvāna huuñ par kaam meñ hoshiyār huuñ apne

yūsuf kā ḳhayāl aayā jo zindāñ nazar aayā

shoḳh-e-mizha-e-bargashta kī dekhī nigah-e-qahr

aahū bhī mujhe sher-e-niystāñ nazar aayā

māyūs phirī aatī haiñ kyuuñ merī duā.eñ

kyā bāb-e-ijābat pe bhī darbāñ nazar aayā

maiñ zar-e-mah-e-nau huuñ ki us ne mujhe ai 'mehr'

jab ġhaur se dekhā to kahā haañ nazar aayā

poshak-e-siyah mein ruKH-e-jaanan nazar aaya

shab ko hamein KHurshid daraKHshan nazar aaya

dekha na kahin kufr na iman nazar aaya

hindu koi paya na musalman nazar aaya

malbus-e-siyah mein ruKH-e-jaanan nazar aaya

zulmat mein yan chashma-e-haiwan nazar aaya

baalon mein chhupa chehra-e-jaanan nazar aaya

parda mein yahan kufr ke iman nazar aaya

phir josh-e-junun silsila-e-jumba nazar aaya

phir be-sar-o-samani ka saman nazar aaya

pariyan jise kandhe pe uThati thin hamesha

barbaad wo aurang-e-sulaiman nazar aaya

bain-hama wusat bhi hai kya KHwan-e-falak-tang

aasuda na us ka koi mehman nazar aaya

aankhon ke tale phir gaya wo aahu-e-shahri

jangal mein jo aahu-e-bayaban nazar aaya

majma mein raqibon ke khula tha tera joDa

kal raat ajab KHwab-e-pareshan nazar aaya

jis dasht mein phuTe hain mere aabla-pa

koson wahi sarsabz-e-nistan nazar aaya

ta-sal-e-digar mai ki KHurd zinda ki mand

mah-e-ramzan saqi-e-dauran nazar aaya

diwana hun par kaam mein hoshiyar hun apne

yusuf ka KHayal aaya jo zindan nazar aaya

shoKH-e-mizha-e-bargashta ki dekhi nigah-e-qahr

aahu bhi mujhe sher-e-niystan nazar aaya

mayus phiri aati hain kyun meri duaen

kya bab-e-ijabat pe bhi darban nazar aaya

main zar-e-mah-e-nau hun ki us ne mujhe ai 'mehr'

jab ghaur se dekha to kaha han nazar aaya