gul-bang thi gulon ki hamara tarana tha

gul-bāñg thī guloñ kī hamārā tarāna thā

apnā bhī us chaman meñ kabhī āshiyāna thā

kūcha meñ us ke naala merā be-kasāna thā

apnā bhī is chaman meñ kabhī āshiyāna thā

jab koī zulf meñ bhī na kuchh daḳhl-e-shāna thā

saudā.ī thā mizāj merā āshiqāna thā

bulbul ko apnā naala mauzūñ tarāna thā

har gul bhī maa.il ġhazal-e-āshiqāna thā

nāloñ meñ bulbuloñ kī jo rañg-e-tarāna thā

fasl-e-bahār thī vo guloñ kā zamāna thā

uljhā huā jo gesū-e-jānāñ meñ shāna thā

sumbul meñ ek aur nayā shāḳh-e-shāna thā

saudā.iyoñ ko thī tirī uljhan balā kī raat

zulf-e-dotā kā tūl-o-tavīl ik fasāna thā

jaate haiñ aap aur burā haal hai mirā

aatī jo ab to maut ko achchhā bahāna thā

tīr-e-nigāh kī jo kamān thī juḌī huī

apnā jigar kabhī to kabhī dil nishāna thā

dariyā-e-mai kī ghaat utāreñge ham unheñ

shīrīñ kā jū-e-shīr kā aglā zamāna thā

apnī shab-e-visāl kā allāh-re ehtimām

shabnam kī shabnamī thī falak shāmiyāna thā

kamlī ko apnā taan ke soyā faqīr mast

kyā pashm thā amīroñ kā jo shāmiyāna thā

ka.aba kā ehtirām ḳhudā-sāz ho gayā

us vaqt meñ kahāñ ye tirā āstāna thā

dair-o-haram meñ kyā thā agar ham se pūchhiye

shāyān-e-sajda-e-yār tirā āstāna thā

kunj-e-qafas meñ shikva-e-sayyād kyā karūñ

us kā qusūr kyā hai merā āb-o-dāna thā

rozī huā hai dāna-e-zanjīr-o-āb-e-teġh

qismat kā āshiqoñ kī ye hai āb-o-dāna thā

lohe ke the chane tire chhīñTe ġhazab ke thī

sayyād ḳhuub apne liye āb-o-dāna thā

ho mujh sā andalīb ḳhush-ilhān asīr-e-dām

sayyād kā nasīb merā āb-o-dāna thā

gandum jo ḳhuld meñ to yahāñ thī sharāb-e-nāb

ik maiñ thā do jagah pe mirā āb-o-dāna thā

rind-e-sharāb-e-ḳhār rahā maiñ tamām-umr

añgūr kā nasīb mujhe āb-o-dāna thā

maiñ vo sadaf huuñ jis ke hai dariyā-dilī kā shor

jo hans chug rahā hai mirā āb-o-dāna thā

bulbul ke aage apnī baḌī baat rah ga.ī

ġhuncha se to kahīñ terā chhūTā diyā na haath

rañgīñ-ḳhayāliyāñ dam-e-fikr-e-suḳhan na thiiñ

zeb tan-e-urūs libās-e-shahāna thā

missī kabhī malī kabhī gesū banā kiye

shab-bhar shab-e-visāl meñ hīla-bahāna thā

tujh se sivā to ai sanam allāh kā hī naam

achchhā thā haañ hasīn thā yūsuf burā na thā

yārān-e-raftagāñ kā nishāñ ḳhaak DhūñDhiye

reg-e-ravāñ kā qāfila thā jo ravāna thā

muñh dekhī un ke sāmne kahte nahīñ haiñ ham

apnī zabān pe vasf-e-dahan ġhā.ebāna thā

bād-e-bahār jā ke oḌā laa.ī baaġh meñ

kyā ganj-e-shā.egān zar-e-gul kā ḳhazāna thā

apnā samand-e-umr jamā jam ke uḌ gayā

shāyad hamārā rāz-e-nafas tāziyāna thā

rāz-e-nihāñ kisī pe na apnā ayaañ huā

nā-āshnā-e-gosh hamārā fasāna thā

pahchāniye to ḳhaak ke putloñ kī ḳhaak ko

begāna kaun kaun sā un meñ yagāna thā

us sho.ala-rū kī thī jo dil-e-sāf meñ jagah

ātish-kada ye 'mehr' kā ā.īna-ḳhāna thā

gul-bang thi gulon ki hamara tarana tha

apna bhi us chaman mein kabhi aashiyana tha

kucha mein us ke nala mera be-kasana tha

apna bhi is chaman mein kabhi aashiyana tha

jab koi zulf mein bhi na kuchh daKHl-e-shana tha

saudai tha mizaj mera aashiqana tha

bulbul ko apna nala mauzun tarana tha

har gul bhi mail ghazal-e-ashiqana tha

nalon mein bulbulon ki jo rang-e-tarana tha

fasl-e-bahaar thi wo gulon ka zamana tha

uljha hua jo gesu-e-jaanan mein shana tha

sumbul mein ek aur naya shaKH-e-shana tha

saudaiyon ko thi teri uljhan bala ki raat

zulf-e-dota ka tul-o-tawil ek fasana tha

jate hain aap aur bura haal hai mera

aati jo ab to maut ko achchha bahana tha

tir-e-nigah ki jo kaman thi juDi hui

apna jigar kabhi to kabhi dil nishana tha

dariya-e-mai ki ghat utarenge hum unhen

shirin ka ju-e-shir ka agla zamana tha

apni shab-e-visal ka allah-re ehtimam

shabnam ki shabnami thi falak shamiyana tha

kamli ko apna tan ke soya faqir mast

kya pashm tha amiron ka jo shamiyana tha

kaba ka ehtiram KHuda-saz ho gaya

us waqt mein kahan ye tera aastana tha

dair-o-haram mein kya tha agar hum se puchhiye

shayan-e-sajda-e-yar tera aastana tha

kunj-e-qafas mein shikwa-e-sayyaad kya karun

us ka qusur kya hai mera aab-o-dana tha

rozi hua hai dana-e-zanjir-o-ab-e-tegh

qismat ka aashiqon ki ye hai aab-o-dana tha

lohe ke the chane tere chhinTe ghazab ke thi

sayyaad KHub apne liye aab-o-dana tha

ho mujh sa andalib KHush-ilhan asir-e-dam

sayyaad ka nasib mera aab-o-dana tha

gandum jo KHuld mein to yahan thi sharab-e-nab

ek main tha do jagah pe mera aab-o-dana tha

rind-e-sharab-e-KHar raha main tamam-umr

angur ka nasib mujhe aab-o-dana tha

main wo sadaf hun jis ke hai dariya-dili ka shor

jo hans chug raha hai mera aab-o-dana tha

bulbul ke aage apni baDi baat rah gai

ghuncha se to kahin tera chhuTa diya na hath

rangin-KHayaliyan dam-e-fikr-e-suKHan na thin

zeb tan-e-urus libas-e-shahana tha

missi kabhi mali kabhi gesu bana kiye

shab-bhar shab-e-visal mein hila-bahana tha

tujh se siwa to ai sanam allah ka hi nam

achchha tha han hasin tha yusuf bura na tha

yaran-e-raftagan ka nishan KHak DhunDhiye

reg-e-rawan ka qafila tha jo rawana tha

munh dekhi un ke samne kahte nahin hain hum

apni zaban pe wasf-e-dahan ghaebana tha

baad-e-bahaar ja ke oDa lai bagh mein

kya ganj-e-shaegan zar-e-gul ka KHazana tha

apna samand-e-umr jama jam ke uD gaya

shayad hamara raaz-e-nafas taziyana tha

raaz-e-nihan kisi pe na apna ayan hua

na-ashna-e-gosh hamara fasana tha

pahchaniye to KHak ke putlon ki KHak ko

begana kaun kaun sa un mein yagana tha

us shoala-ru ki thi jo dil-e-saf mein jagah

aatish-kada ye 'mehr' ka aaina-KHana tha