hausla kho na diya teri nahin se humne

hausla kho na diyā terī nahīñ se ham ne

kitnī shiknoñ ko chunā terī jabīñ se ham ne

vo bhī kyā din the ki dīvāna bane phirte the

sun liyā thā tire baare meñ kahīñ se ham ne

jis jagah pahle-pahal naam tirā aatā hai

dāstāñ apnī sunā.ī hai vahīñ se ham ne

yuuñ to ehsān hasīnoñ ke uThā.e haiñ bahut

pyaar lekin jo kiyā hai to tumhīñ se ham ne

kuchh samajh kar hī ḳhudā tujh ko kahā hai varna

kaun sī baat kahī itne yaqīñ se ham ne

hausla kho na diya teri nahin se hum ne

kitni shiknon ko chuna teri jabin se hum ne

wo bhi kya din the ki diwana bane phirte the

sun liya tha tere bare mein kahin se hum ne

jis jagah pahle-pahal nam tera aata hai

dastan apni sunai hai wahin se hum ne

yun to ehsan hasinon ke uThae hain bahut

pyar lekin jo kiya hai to tumhin se hum ne

kuchh samajh kar hi KHuda tujh ko kaha hai warna

kaun si baat kahi itne yaqin se hum ne