hawa-e-tez mein itna jala bujha hun main

havā-e-tez meñ itnā jalā bujhā huuñ maiñ

shab-e-siyāh se kah do ki thak gayā huuñ maiñ

mujhe tumhārī mohabbat abhī qubūl nahīñ

ka.ī udaas se chehroñ kā aasrā huuñ maiñ

tirī galī ke sivā aur dekhā bhī kyā hai

ki tere shahr meñ ab bhī nayā nayā huuñ maiñ

jo mas.ala thā udāsī kā merī zaat kā thā

mujhe lagā thā mohabbat meñ ġham-zada huuñ maiñ

kisī ne mujh ko batāyā abhī abhī aa kar

tumhāre dar pe baḌī der se khaḌā huuñ maiñ

ajiib hai ki tumheñ phir bhī ishq hai mujh se

sunā to tum ne bhī hogā ki bevafā huuñ maiñ

mujhe ye zindagī ab jaane bhī nahīñ degī

use ye kis ne batāyā ki mar rahā huuñ maiñ

hawa-e-tez mein itna jala bujha hun main

shab-e-siyah se kah do ki thak gaya hun main

mujhe tumhaari mohabbat abhi qubul nahin

kai udas se chehron ka aasra hun main

teri gali ke siwa aur dekha bhi kya hai

ki tere shahr mein ab bhi naya naya hun main

jo masala tha udasi ka meri zat ka tha

mujhe laga tha mohabbat mein gham-zada hun main

kisi ne mujh ko bataya abhi abhi aa kar

tumhaare dar pe baDi der se khaDa hun main

ajib hai ki tumhein phir bhi ishq hai mujh se

suna to tum ne bhi hoga ki bewafa hun main

mujhe ye zindagi ab jaane bhi nahin degi

use ye kis ne bataya ki mar raha hun main