hawa-e-tez tera ek kaam aaKHiri hai

havā-e-tez tirā ek kaam āḳhirī hai

ki naḳhl-e-ḳhushk pe māh-e-tamām āḳhirī hai

maiñ jis sukūn se baiThā huuñ is kināre par

sukūñ se lagtā hai merā qayām āḳhirī hai

phir is ke ba.ad ye bāzār-e-dil nahīñ lagnā

ḳharīd lījiye sāhib ġhulām āḳhirī hai

guzar chalā huuñ kisī ko yaqīñ dilātā huā

ki lauh-e-dil pe raqam hai jo naam āḳhirī hai

tabhī to peḌ kī āñkhoñ meñ chāñd bhar aayā

kisī ne kah diyā hogā ki shaam āḳhirī hai

ye lag rahā hai mohabbat ke pahle ziine par

ki jis maqām pe huuñ ye maqām āḳhirī hai

kisī ne phir se khaḌe kar diye dar-o-dīvār

ḳhayāl thā ki mirā inhidām āḳhirī hai

hamāre jaise vahāñ kis shumār meñ hoñge

ki jis qatār meñ majnūñ kā naam āḳhirī hai

shurū-e-ishq meñ aisī udāsiyāñ 'tābish'

har ek shaam ye lagtā hai shaam āḳhirī hai

hawa-e-tez tera ek kaam aaKHiri hai

ki naKHl-e-KHushk pe mah-e-tamam aaKHiri hai

main jis sukun se baiTha hun is kinare par

sukun se lagta hai mera qayam aaKHiri hai

phir is ke baad ye bazar-e-dil nahin lagna

KHarid lijiye sahib ghulam aaKHiri hai

guzar chala hun kisi ko yaqin dilata hua

ki lauh-e-dil pe raqam hai jo nam aaKHiri hai

tabhi to peD ki aankhon mein chand bhar aaya

kisi ne kah diya hoga ki sham aaKHiri hai

ye lag raha hai mohabbat ke pahle zine par

ki jis maqam pe hun ye maqam aaKHiri hai

kisi ne phir se khaDe kar diye dar-o-diwar

KHayal tha ki mera inhidam aaKHiri hai

hamare jaise wahan kis shumar mein honge

ki jis qatar mein majnun ka nam aaKHiri hai

shuru-e-ishq mein aisi udasiyan 'tabish'

har ek sham ye lagta hai sham aaKHiri hai