hawa ke lab pe nae intisab se kuchh hain

havā ke lab pe na.e intisāb se kuchh haiñ

ki shāḳh-e-vasl pe taaza gulāb se kuchh haiñ

ye pal kā qissa hai sadiyoñ pe jo muhīt rahā

bar-āb sā.at-e-guzarāñ habāb se kuchh haiñ

hujūm ham ko sar āñkhoñ pe kyuuñ biThā.e rahā

dil-o-nazar pe hamāre azaab se kuchh haiñ

lahū rulāte haiñ aur phir bhī yaad aate haiñ

mohabbatoñ ke purāne nisāb se kuchh haiñ

utarte rahte haiñ āñkhoñ ke ā.inoñ pe sadā

kitāb-e-ḳhasta meñ gum-gashta baab se kuchh haiñ

sivā.e tishnagī kuchh aur de sake na hameñ

jo zer-e-āb chamakte sarāb se kuchh haiñ

mudām un ko chamaknā baġhair ḳhauf-e-fanā

ye āsmān pe jo be-hisāb se kuchh haiñ

hawa ke lab pe nae intisab se kuchh hain

ki shaKH-e-wasl pe taza gulab se kuchh hain

ye pal ka qissa hai sadiyon pe jo muhit raha

bar-ab saat-e-guzaran habab se kuchh hain

hujum hum ko sar aankhon pe kyun biThae raha

dil-o-nazar pe hamare azab se kuchh hain

lahu rulate hain aur phir bhi yaad aate hain

mohabbaton ke purane nisab se kuchh hain

utarte rahte hain aankhon ke aainon pe sada

kitab-e-KHasta mein gum-gashta bab se kuchh hain

siwae tishnagi kuchh aur de sake na hamein

jo zer-e-ab chamakte sarab se kuchh hain

mudam un ko chamakna baghair KHauf-e-fana

ye aasman pe jo be-hisab se kuchh hain