hawa ke ruKH pe khula baadban andhere ka

havā ke ruḳh pe khulā bādbāñ añdhere kā

yahāñ pe naam nahīñ ab kisī savere kā

uThā ke le gayā sarvat kabhī kā hai jogī

koī surāġh nahīñ ab usī ke phere kā

havā-e-garm ke tapte libās meñ pahroñ

vo saaya Tāñktā hai har shajar ghanere kā

har ek shāḳh se sandal ke saañp haiñ lipTe

asar pazīr nahīñ koī dam sapere kā

sukūt vo hai ki jāmid hai lamha-e-maujūd

hayāt ḳhvāb ho jaise kisī luTere kā

har ek saañs pe dhaḌkā hai maut kā 'ābid'

ye zindagī hai ki hai ghar kisī vadere kā

hawa ke ruKH pe khula baadban andhere ka

yahan pe nam nahin ab kisi sawere ka

uTha ke le gaya sarwat kabhi ka hai jogi

koi suragh nahin ab usi ke phere ka

hawa-e-garm ke tapte libas mein pahron

wo saya Tankta hai har shajar ghanere ka

har ek shaKH se sandal ke sanp hain lipTe

asar pazir nahin koi dam sapere ka

sukut wo hai ki jamid hai lamha-e-maujud

hayat KHwab ho jaise kisi luTere ka

har ek sans pe dhaDka hai maut ka 'abid'

ye zindagi hai ki hai ghar kisi wadere ka