hawa ko aur bhi kuchh tez kar gae hain log

havā ko aur bhī kuchh tez kar ga.e haiñ log

charāġh le ke na jaane kidhar ga.e haiñ log

safar ke shauq meñ itne azaab jhele haiñ

ki ab to qasd-e-safar hī se Dar ga.e haiñ log

dhuāñ dhuāñ nazar aatī haiñ shahr kī galiyāñ

sunā hai aaj sar-e-shām ghar ga.e haiñ log

jahāñ se nikle haiñ raste musāfiroñ ke liye

makān aise bhī ta.amīr kar ga.e haiñ log

kabhī kabhī to judā.ī kī lazzateñ de kar

rafāqatoñ meñ nayā rañg bhar ga.e haiñ log

malāl-e-tark-e-ta.alluq na jaane kyā hotā

ḳhayāl-e-tark-e-ta.alluq se mar ga.e haiñ log

ġhurūr tund havāoñ kā yuuñ bhī toḌā hai

charāġh haath pe rakh kar guzar ga.e haiñ log

koī javāb nahīñ fikr kī bulandī kā

zamīñ pe rah ke bhī aflāk par ga.e haiñ log

qarīb the to faqat vāsta thā āñkhoñ se

judā hue haiñ to dil meñ utar ga.e haiñ log

vo gesuoñ kī ghaTā ho ki daar kā saaya

jahāñ bhī chhāñv milī hai Thahar ga.e haiñ log

ye aur baat ki ghar bujh ga.e haiñ ai 'shā.er'

magar vatan meñ charāġhāñ to kar ga.e haiñ log

hawa ko aur bhi kuchh tez kar gae hain log

charagh le ke na jaane kidhar gae hain log

safar ke shauq mein itne azab jhele hain

ki ab to qasd-e-safar hi se Dar gae hain log

dhuan dhuan nazar aati hain shahr ki galiyan

suna hai aaj sar-e-sham ghar gae hain log

jahan se nikle hain raste musafiron ke liye

makan aise bhi tamir kar gae hain log

kabhi kabhi to judai ki lazzaten de kar

rafaqaton mein naya rang bhar gae hain log

malal-e-tark-e-talluq na jaane kya hota

KHayal-e-tark-e-talluq se mar gae hain log

ghurur tund hawaon ka yun bhi toDa hai

charagh hath pe rakh kar guzar gae hain log

koi jawab nahin fikr ki bulandi ka

zamin pe rah ke bhi aflak par gae hain log

qarib the to faqat wasta tha aankhon se

juda hue hain to dil mein utar gae hain log

wo gesuon ki ghaTa ho ki dar ka saya

jahan bhi chhanw mili hai Thahar gae hain log

ye aur baat ki ghar bujh gae hain ai 'shaer'

magar watan mein charaghan to kar gae hain log