hawa mein zor udhar sud-o-ziyan ka

havā meñ zor udhar sūd-o-ziyāñ kā

idhar paivand-e-ḳhasta bādbāñ kā

darīcha kholne se aar tum ko

hameñ bhī Dar bahut hai shahr-e-jāñ kā

mire hisse meñ hai ḳhāna-ḳharābī

tirī qismat meñ rasta kahkashāñ kā

chalo chal kar takān apnī utāreñ

kahīñ rasta na kho jaa.e makāñ kā

kisī ke palle kyā paḌtī kahānī

varaq gum hai hamārī dāstāñ kā

ye kis se mo.ajiza sarzad huā hai

har ik dar khul gayā hai jism-o-jāñ kā

sajā.eñ bā-dil-e-nā-ḳhvāsta kyoñ

zabān-e-yār meñ taḳhta dukāñ kā

hawa mein zor udhar sud-o-ziyan ka

idhar paiwand-e-KHasta baadban ka

daricha kholne se aar tum ko

hamein bhi Dar bahut hai shahr-e-jaan ka

mere hisse mein hai KHana-KHarabi

teri qismat mein rasta kahkashan ka

chalo chal kar takan apni utaren

kahin rasta na kho jae makan ka

kisi ke palle kya paDti kahani

waraq gum hai hamari dastan ka

ye kis se moajiza sarzad hua hai

har ek dar khul gaya hai jism-o-jaan ka

sajaen ba-dil-e-na-KHwasta kyon

zaban-e-yar mein taKHta dukan ka