hawa ne chhin liya aa ke mere honTon se

havā ne chhīn liyā aa ke mere hoñToñ se

vo ek giit jo maiñ gungunā rahā thā abhī

vo jā ke niind ke pahlū meñ mujh se chhupne lagā

maiñ us ko apnī kahānī sunā rahā thā abhī

ki dil meñ aa ke nayā tiir ho gayā paivast

purānā zaḳhm maiñ us ko dikhā rahā thā abhī

baras rahī thī zamīñ par ajiib madhoshī

na jaane kaun fazāoñ meñ gā rahā thā abhī

ufuq ke paar ye Duubā hai kis tarah sūraj

yahīñ pe baiTh ke bāteñ banā rahā thā abhī

uThā ke dhuup ne ghar se mujhe nikāl diyā

maiñ intizār kī sham.eñ jalā rahā thā abhī

jo sab ko hañsne kī talqīn kartā rahā hai

vo mere sāmne aañsū bahā rahā thā abhī

vo jis kā naam paḌā hai ḳhamosh logoñ meñ

yahāñ pe lafzoñ ke dariyā bahā rahā thā abhī

hawa ne chhin liya aa ke mere honTon se

wo ek git jo main gunguna raha tha abhi

wo ja ke nind ke pahlu mein mujh se chhupne laga

main us ko apni kahani suna raha tha abhi

ki dil mein aa ke naya tir ho gaya paiwast

purana zaKHm main us ko dikha raha tha abhi

baras rahi thi zamin par ajib madhoshi

na jaane kaun fazaon mein ga raha tha abhi

ufuq ke par ye Duba hai kis tarah suraj

yahin pe baiTh ke baaten bana raha tha abhi

uTha ke dhup ne ghar se mujhe nikal diya

main intizar ki shamen jala raha tha abhi

jo sab ko hansne ki talqin karta raha hai

wo mere samne aansu baha raha tha abhi

wo jis ka nam paDa hai KHamosh logon mein

yahan pe lafzon ke dariya baha raha tha abhi