hawa pe chal raha hai chand rahwar ki tarah

havā pe chal rahā hai chāñd rāhvār kī tarah

qadam uThā rahī hai raat ik savār kī tarah

fasīl-e-vādi-e-ḳhayāl se utar rahī hai shab

kisī ḳhamosh aur udaas ābshār kī tarah

taḌap rahā hai bārishoñ meñ mere jism kā shajar

siyāh abr meñ ghire hue chinār kī tarah

inhī udāsiyoñ kī kā.enāt meñ kabhī to maiñ

ḳhizāñ ko jiit lūñgī mausam-e-bahār kī tarah

tire ḳhayāl ke safar meñ tere saath maiñ bhī huuñ

kahīñ kahīñ kisī ġhubār-e-rah-guzār kī tarah

'ubūr kar sakī na fāsloñ kī gardishoñ ko maiñ

buland ho ga.ī zamīn kohsār kī tarah

tire diye kī raushnī ko DhūñDtā hai shaam se

mirā makāñ kisī luTe hue dayār kī tarah

hawa pe chal raha hai chand rahwar ki tarah

qadam uTha rahi hai raat ek sawar ki tarah

fasil-e-wadi-e-KHayal se utar rahi hai shab

kisi KHamosh aur udas aabshaar ki tarah

taDap raha hai barishon mein mere jism ka shajar

siyah abr mein ghire hue chinar ki tarah

inhi udasiyon ki kaenat mein kabhi to main

KHizan ko jit lungi mausam-e-bahaar ki tarah

tere KHayal ke safar mein tere sath main bhi hun

kahin kahin kisi ghubar-e-rah-guzar ki tarah

'ubur kar saki na faslon ki gardishon ko main

buland ho gai zamin kohsar ki tarah

tere diye ki raushni ko DhunDta hai sham se

mera makan kisi luTe hue dayar ki tarah