hawa se rabt zara soch kar banana tha

havā se rabt zarā soch kar banānā thā

hameñ zamīñ pe utarnā thā ghar banānā thā

ḳhushī banānī thī pahle kisī ta.alluq kī

phir is ḳhushī ko bachāne kā Dar banānā thā

hamārī aañkh ko ab tak samajh nahīñ aa.ī

ki pahle ashk yā pahle kohar banānā thā

are ye ishq bhī to manchale kā saudā hai

hamāre bas meñ jo hotā kidhar banānā thā

havā to roz sunātī thī dhuup rauzan se

magar hameñ yahāñ sūraj sā dar banānā thā

suno ye aib kisī rañg se nahīñ chhupne

bas ek hal thā hameñ toḌ kar banānā thā

muaaf karnā tujhe khul ke likh nahīñ paa.e

hameñ ye qissa zarā muḳhtasar banānā thā

hawa se rabt zara soch kar banana tha

hamein zamin pe utarna tha ghar banana tha

KHushi banani thi pahle kisi talluq ki

phir is KHushi ko bachane ka Dar banana tha

hamari aankh ko ab tak samajh nahin aai

ki pahle ashk ya pahle kohar banana tha

are ye ishq bhi to manchale ka sauda hai

hamare bas mein jo hota kidhar banana tha

hawa to roz sunati thi dhup rauzan se

magar hamein yahan suraj sa dar banana tha

suno ye aib kisi rang se nahin chhupne

bas ek hal tha hamein toD kar banana tha

muaf karna tujhe khul ke likh nahin pae

hamein ye qissa zara muKHtasar banana tha