hawadis par na ai nadan nazar kar

havādis par na ai nādāñ nazar kar

qazā se jañg be-ḳhauf-o-ḳhatar kar

muāfī bhī sazā se kam nahīñ hai

bas ab is darguzar se darguzar kar

jahāñ Duubī thī kashtī aarzū kī

usī girdāb meñ niklī ubhar kar

kabhī to mā.il-e-tark-e-sitam ho

kabhī mujh par karam kī bhī nazar kar

guzārā to yahāñ mushkil hai ai dil

magar ab jis tarah bhī ho guzar kar

vo mujh ḳhūnīñ-kafan se pūchhte haiñ

kahāñ jaane lage ho ban-sañvar kar

vahī hastī kā chakkar hai yahāñ bhī

bhañvar hī meñ rahe ham paar utar kar

mirī muḳhtāriyoñ ke saath yā-rab

mirī majbūriyoñ par bhī nazar kar

na.e aalam idhar bhī haiñ udhar bhī

yahī dekhā do-ālam se guzar kar

bayān-e-dard-e-dil ai 'josh' kab tak

ḳhudā-rā ab ye qissa muḳhtasar kar

hawadis par na ai nadan nazar kar

qaza se jang be-KHauf-o-KHatar kar

muafi bhi saza se kam nahin hai

bas ab is darguzar se darguzar kar

jahan Dubi thi kashti aarzu ki

usi girdab mein nikli ubhar kar

kabhi to mail-e-tark-e-sitam ho

kabhi mujh par karam ki bhi nazar kar

guzara to yahan mushkil hai ai dil

magar ab jis tarah bhi ho guzar kar

wo mujh KHunin-kafan se puchhte hain

kahan jaane lage ho ban-sanwar kar

wahi hasti ka chakkar hai yahan bhi

bhanwar hi mein rahe hum par utar kar

meri muKHtariyon ke sath ya-rab

meri majburiyon par bhi nazar kar

nae aalam idhar bhi hain udhar bhi

yahi dekha do-alam se guzar kar

bayan-e-dard-e-dil ai 'josh' kab tak

KHuda-ra ab ye qissa muKHtasar kar