ہوس خلوت خورشید و نشاں اور سہی

ہوس خلوت خورشید و نشاں اور سہی

دور ہے صبح تو یہ خواب گراں اور سہی

کچھ شکستہ سا ہے رنگینی‌ و نکہت کا طلسم

یہی بیداد خزاں ہے تو خزاں اور سہی

مرحلے دانش حاضر کے تو سب ختم ہوئے

اک قدم جانب اقلیم گماں اور سہی

میری پلکیں بھی گراں بار رہی ہیں اے دوست

اب یہ آنسو ترے دامن پہ گراں اور سہی

جلوۂ حسن بتاں سے ہے اگر دل کا زیاں

اے خدا وند مرے دل کا زیاں اور سہی

سینکڑوں رخ ہیں محبت کی کہانی کے روشؔ

ایک انداز حدیث دگراں اور سہی