hawas ne mujhse puchha tha tumhaara kya irada hai

havas ne mujh se pūchhā thā tumhārā kyā irāda hai

badan kār-e-mohabbat meñ barā.e istifāda hai

kabhī pahnā nahīñ us ne mire ashkoñ kā pairāhan

udāsī merī āñkhoñ meñ azal se be-libāda hai

bhaḌak kar sho.ala-e-vahshat lahū meñ bujh gayā hogā

zarā sī aag thī lekin dhuāñ kitnā ziyāda hai

agar tum ġhaur se dekho ruḳh-e-mahtāb kam paḌ jaa.e

falak par ik sitāre kī jabīñ itnī kushāda hai

mujhe maskan samajhte haiñ ajab aaseb haiñ ġham ke

maiñ ik do se nimaT bhī luuñ ye puurā ḳhānvāda hai

use dhande se matlab hai vo dīmak bechne vaalā

use vo ḳhaak samjhegā ye ḳhvāboñ kā burāda hai

ham us se chaah kar bhī bach nahīñ sakte kisī sūrat

nibhānā paḌtā hai is ko mohabbat ek va.ada hai

mujhe shatranj ke ḳhānoñ meñ chalnā tū sikhā.egā

maiñ farzī ban chukā kab kā tū ab tak ik piyāda hai

na-jāne kātib-e-taqdīr ne kyā likh diyā us par

mirī taqdīr kā saf.ha na sīdhā hai na saada hai

maiñ is hālat meñ 'zeb' āḳhir kahāñ chalte hue jā.ūñ

na mujh meñ hausla baaqī na manzil hai na jaada hai

hawas ne mujh se puchha tha tumhaara kya irada hai

badan kar-e-mohabbat mein barae istifada hai

kabhi pahna nahin us ne mere ashkon ka pairahan

udasi meri aankhon mein azal se be-libaada hai

bhaDak kar shoala-e-wahshat lahu mein bujh gaya hoga

zara si aag thi lekin dhuan kitna ziyaada hai

agar tum ghaur se dekho ruKH-e-mahtab kam paD jae

falak par ek sitare ki jabin itni kushada hai

mujhe maskan samajhte hain ajab aaseb hain gham ke

main ek do se nimaT bhi lun ye pura KHanwada hai

use dhande se matlab hai wo dimak bechne wala

use wo KHak samjhega ye KHwabon ka burada hai

hum us se chah kar bhi bach nahin sakte kisi surat

nibhana paDta hai is ko mohabbat ek wada hai

mujhe shatranj ke KHanon mein chalna tu sikhaega

main farzi ban chuka kab ka tu ab tak ek piyaada hai

na-jaane katib-e-taqdir ne kya likh diya us par

meri taqdir ka safha na sidha hai na sada hai

main is haalat mein 'zeb' aaKHir kahan chalte hue jaun

na mujh mein hausla baqi na manzil hai na jada hai