hawas o wafa ki siyasaton mein bhi kaamyab nahin raha

havas o vafā kī siyāsatoñ meñ bhī kāmyāb nahīñ rahā

koī chehra aisā bhī chāhiye jo pas-e-naqāb nahīñ rahā

tirī aarzū se bhī kyuuñ nahīñ ġham-e-zindagī meñ koī kamī

ye savāl vo hai ki jis kā ab koī ik javāb nahīñ rahā

thiiñ samā.ateñ sar hāo-hū chhiḌī qissa-ḳhānoñ kī guftugū

vahī jis ne bazm sajā.ī thī vahī bāryāb nahīñ rahā

kam o besh ek se pairahan kam o besh ek sā hai chalan

sar-e-rahguzar kisī vasf kā koī intiḳhāb nahīñ rahā

vo kitāb-e-dil jise rabt thā tire kaif-e-hijr-o-visāl se

vo kitāb-e-dil to likhī ga.ī magar intisāb nahīñ rahā

maiñ har ek shab yahī band āñkhoñ se pūchhtā huuñ sahar talak

ki ye niind kis liye uḌ ga.ī agar ek ḳhvāb nahīñ rahā

yahāñ rāste bhī haiñ be-shajar hai munāfiqat bhī yahāñ hunar

mujhe apne aap pe faḳhr hai ki maiñ kāmyāb nahīñ rahā

faqat ek lamhe meñ munkashif huī sham-e-mausam-e-ārzū

'sahar' us ke chehre kī samt jab gul-e-āftāb nahīñ rahā

hawas o wafa ki siyasaton mein bhi kaamyab nahin raha

koi chehra aisa bhi chahiye jo pas-e-naqab nahin raha

teri aarzu se bhi kyun nahin gham-e-zindagi mein koi kami

ye sawal wo hai ki jis ka ab koi ek jawab nahin raha

thin samaaten sar hao-hu chhiDi qissa-KHanon ki guftugu

wahi jis ne bazm sajai thi wahi baryab nahin raha

kam o besh ek se pairahan kam o besh ek sa hai chalan

sar-e-rahguzar kisi wasf ka koi intiKHab nahin raha

wo kitab-e-dil jise rabt tha tere kaif-e-hijr-o-visal se

wo kitab-e-dil to likhi gai magar intisab nahin raha

main har ek shab yahi band aankhon se puchhta hun sahar talak

ki ye nind kis liye uD gai agar ek KHwab nahin raha

yahan raste bhi hain be-shajar hai munafiqat bhi yahan hunar

mujhe apne aap pe faKHr hai ki main kaamyab nahin raha

faqat ek lamhe mein munkashif hui sham-e-mausam-e-arzu

'sahar' us ke chehre ki samt jab gul-e-aftab nahin raha