hawas ye rah gai dil mein ki muddaa na mila

havas ye rah ga.ī dil meñ ki mudda.ā na milā

bahut jahān meñ DhūñDhā par āshnā na milā

huā hai kaun sā ma.ashūq bā-vafā ai dil

gilā abas hai agar vo milā milā na milā

ajiib qismat-e-bad thī shab-e-firāq meñ ham

kamāl DhūñDh phire ḳhāna-e-qazā na milā

na de tū haath se huuñ zo.af se maiñ rañg-e-hinā

havā-e-shauq-e-fanā meñ jahāñ uḌā na milā

javāb degī bhalā roz-e-bāz-purs to kyā

uḌā uḌā ke hameñ ḳhaak meñ sabā na milā

vo kushta-e-nigah-e-qahr thā ki mahshar meñ

mire jalāne ko ahkām-e-dil-rubā na milā

ġharīq-e-bahr-e-sitam umr kī huī kashtī

bahut sā ham ne pukārā pa nā-ḳhudā na milā

kamāl-o-aish-o-javānī-o-mulk-o-māl-o-tarab

ye sab mile hameñ par yaar bā-vafā na milā

ajiib josh-e-junūñ meñ huī thī pāmālī

ki ek aabla tak dost-dār-e-pā na milā

chubhe hazār tamannā se kyuuñ na be-khaTke

ki ḳhaar ko koī ham sā barahna-pā na milā

bahut sī karte rahe bāġh-e-dahr meñ gul-gasht

par apne bulbul-e-dil ko 'nasīm' sā na milā

hawas ye rah gai dil mein ki muddaa na mila

bahut jahan mein DhunDha par aashna na mila

hua hai kaun sa mashuq ba-wafa ai dil

gila abas hai agar wo mila mila na mila

ajib qismat-e-bad thi shab-e-firaq mein hum

kamal DhunDh phire KHana-e-qaza na mila

na de tu hath se hun zoaf se main rang-e-hina

hawa-e-shauq-e-fana mein jahan uDa na mila

jawab degi bhala roz-e-baz-purs to kya

uDa uDa ke hamein KHak mein saba na mila

wo kushta-e-nigah-e-qahr tha ki mahshar mein

mere jalane ko ahkaam-e-dil-ruba na mila

ghariq-e-bahr-e-sitam umr ki hui kashti

bahut sa hum ne pukara pa na-KHuda na mila

kamal-o-aish-o-jawani-o-mulk-o-mal-o-tarab

ye sab mile hamein par yar ba-wafa na mila

ajib josh-e-junun mein hui thi pamali

ki ek aabla tak dost-dar-e-pa na mila

chubhe hazar tamanna se kyun na be-khaTke

ki KHar ko koi hum sa barahna-pa na mila

bahut si karte rahe bagh-e-dahr mein gul-gasht

par apne bulbul-e-dil ko 'nasim' sa na mila