haya-e-ruh gul-eazaz bhi hai

hayā-e-rūh gul-e.azāz bhī hai

shu.ūr-e-zindagī kā raaz bhī hai

mohabbat rāz-andar-rāz bhī hai

kahīñ ye soz bhī hai saaz bhī hai

use kaise na dil de duuñ ki jis meñ

vafā bhī husn bhī andāz bhī hai

rah-e-ishq-o-vafā meñ zindagānī

tarāna bhī hai soz-o-sāz bhī hai

mohabbat meñ na dekh anjām ai dil

ye ik be-intihā āġhāz bhī hai

tabassum hī nahīñ ġhārat-gar-e-dil

balā-e-jāñ ḳhirām-e-nāz bhī hai

dil-e-'jauhar' hai ik āshiq kī duniyā

ki ye pāmāl-e-husn-o-nāz bhī hai

haya-e-ruh gul-eazaz bhi hai

shuur-e-zindagi ka raaz bhi hai

mohabbat raaz-andar-raaz bhi hai

kahin ye soz bhi hai saz bhi hai

use kaise na dil de dun ki jis mein

wafa bhi husn bhi andaz bhi hai

rah-e-ishq-o-wafa mein zindagani

tarana bhi hai soz-o-saz bhi hai

mohabbat mein na dekh anjam ai dil

ye ek be-intiha aaghaz bhi hai

tabassum hi nahin ghaarat-gar-e-dil

bala-e-jaan KHiram-e-naz bhi hai

dil-e-'jauhar' hai ek aashiq ki duniya

ki ye pamal-e-husn-o-naz bhi hai