hayat-o-maut ki uljhan mein Dalta kyon hai

hayāt-o-maut kī uljhan meñ Dāltā kyoñ hai

ye tohmateñ mire uupar uchhāltā kyoñ hai

ab aa gayā huuñ to ḳhatre meñ Dāltā kyoñ hai

añdherī raat meñ ghar se nikāltā kyoñ hai

abhī mo.āmla-e-kā.enāt tai kar de

zarā sī baat qayāmat pe Tāltā kyoñ hai

kisī tarah bhī to insāñ tirā harīf nahīñ

phir is ġharīb ko tū maar Dāltā kyoñ hai

nadīm terā to is meñ koī mafād nahīñ

maiñ gir rahā huuñ tū mujh ko sañbhāltā kyoñ hai

mujhe bachā na sakegā tū ġharq hone se

fuzūl ḳhud ko halākat meñ Dāltā kyoñ hai

kisī tarah to ye ehsās kā azaab miTe

tū mere siine se ḳhanjar nikāltā kyoñ hai

tū apnī fikr ko kuchh bhī samajh magar 'tāhir'

kisī ke sher meñ kiiḌe nikāltā kyoñ hai

hayat-o-maut ki uljhan mein Dalta kyon hai

ye tohmaten mere upar uchhaalta kyon hai

ab aa gaya hun to KHatre mein Dalta kyon hai

andheri raat mein ghar se nikalta kyon hai

abhi moamla-e-kaenat tai kar de

zara si baat qayamat pe Talta kyon hai

kisi tarah bhi to insan tera harif nahin

phir is gharib ko tu mar Dalta kyon hai

nadim tera to is mein koi mafad nahin

main gir raha hun tu mujh ko sanbhaalta kyon hai

mujhe bacha na sakega tu gharq hone se

fuzul KHud ko halakat mein Dalta kyon hai

kisi tarah to ye ehsas ka azab miTe

tu mere sine se KHanjar nikalta kyon hai

tu apni fikr ko kuchh bhi samajh magar 'tahir'

kisi ke sher mein kiDe nikalta kyon hai