hazar bandish-e-auqat se nikalta hai

hazār bandish-e-auqāt se nikaltā hai

ye din nahīñ jo mirī raat se nikaltā hai

vo raushnī meñ bhī hotā nahīñ kahīñ maujūd

jo rañg māh-e-mulāqāt se nikaltā hai

mujhe bahut hai jo ḳhushbū kā ek jhoñkā sā

kabhī kabhī tire bāġhāt se nikaltā hai

isī navāh meñ ābād huuñ kahīñ maiñ bhī

dhuāñ jo mere mazāfāt se nikaltā hai

dil aur tarha ke hālāt se ulajhtā huā

kuchh aur tarha ke hālāt se nikaltā hai

subūt saarā hamāre ḳhilāf bhī ab to

hamāre apne bayānāt se nikaltā hai

jo chāroñ samt girānī kī hai farāvānī

to qahat bhī isī buhtāt se nikaltā hai

vo lahn jis kā sarokār hī nahīñ mujh se

kabhī to vo bhī mirī zaat se nikaltā hai

'zafar' ye bā.is-e-tashvīsh bhī hai sab ke liye

jo matlab aur mirī baat se nikaltā hai

hazar bandish-e-auqat se nikalta hai

ye din nahin jo meri raat se nikalta hai

wo raushni mein bhi hota nahin kahin maujud

jo rang mah-e-mulaqat se nikalta hai

mujhe bahut hai jo KHushbu ka ek jhonka sa

kabhi kabhi tere baghat se nikalta hai

isi nawah mein aabaad hun kahin main bhi

dhuan jo mere mazafat se nikalta hai

dil aur tarha ke haalat se ulajhta hua

kuchh aur tarha ke haalat se nikalta hai

subut sara hamare KHilaf bhi ab to

hamare apne bayanat se nikalta hai

jo chaaron samt girani ki hai farawani

to qahat bhi isi buhtat se nikalta hai

wo lahn jis ka sarokar hi nahin mujh se

kabhi to wo bhi meri zat se nikalta hai

'zafar' ye bais-e-tashwish bhi hai sab ke liye

jo matlab aur meri baat se nikalta hai