hazar haif chhuTa sath ham-nashinon ka

hazār haif chhuTā saath ham-nashīnoñ kā

makāñ to hai pe Thikānā nahīñ makīnoñ kā

khilā jo baaġh meñ ġhuncha sitāra-dār khilā

guloñ ne naqsh utārā hai mah-jabīnoñ kā

hai apnī apnī tabī.at pe husn-e-shai mauqūf

maiñ kyuuñ huuñ banda-e-be-dām un hasīnoñ kā

nazar kā kyā hai bharosa nazar pe haiñ parde

ḳhayāl arsh pe jaatā hai dūr-bīnoñ kā

zamīn-e-shor ho yā ho zamīn-e-sher ai dil

nahīñ hai koī ḳharīdār in zamīnoñ kā

bahisht-e-dahr hai apnā vatan ḳhudā kī qasam

judā judā hai tarāna sabhī mahīnoñ kā

kisī ko maan liyā dil ne jab to maan liyā

na daḳhl do yahī maslak hai ḳhush-yaqīnoñ kā

jo ho musavvir-e-fitrat misāl kyā us kī

gumāñ na chāhiye insāñ pe ābgīnoñ kā

zarā nikal ke to duniyā se dekh ai insāñ

patā na din kā na andāz hai mahīnoñ kā

sikhā diyā mujhe bach bach ke rāsta chalnā

ḳhudā bhalā kare ai 'shād' nukta-chīnoñ kā

hazar haif chhuTa sath ham-nashinon ka

makan to hai pe Thikana nahin makinon ka

khila jo bagh mein ghuncha sitara-dar khila

gulon ne naqsh utara hai mah-jabinon ka

hai apni apni tabiat pe husn-e-shai mauquf

main kyun hun banda-e-be-dam un hasinon ka

nazar ka kya hai bharosa nazar pe hain parde

KHayal arsh pe jata hai dur-binon ka

zamin-e-shor ho ya ho zamin-e-sher ai dil

nahin hai koi KHaridar in zaminon ka

bahisht-e-dahr hai apna watan KHuda ki qasam

juda juda hai tarana sabhi mahinon ka

kisi ko man liya dil ne jab to man liya

na daKHl do yahi maslak hai KHush-yaqinon ka

jo ho musawwir-e-fitrat misal kya us ki

guman na chahiye insan pe aabginon ka

zara nikal ke to duniya se dekh ai insan

pata na din ka na andaz hai mahinon ka

sikha diya mujhe bach bach ke rasta chalna

KHuda bhala kare ai 'shad' nukta-chinon ka