hazar jaan se sahab nisar hum bhi hain

hazār jaan se sāhab nisār ham bhī haiñ

tumhārī tīr-e-nigah ke shikār ham bhī haiñ

azal se dāḳhil-e-fard-e-shumār ham bhī haiñ

tumhāre chāhne vāloñ meñ yaar ham bhī haiñ

hamesha ham se kudūrat rahī hasīnoñ ko

na dil se nikle kabhī vo ġhubār ham bhī haiñ

musāfiroñ kī tavāzo se naam hotā hai

karam karo ki ġharīb-ud-dayār ham bhī haiñ

sharāb piite haiñ to jāgte haiñ saarī raat

mudām ābid-e-shab-zinda-dār ham bhī haiñ

hazār baar hasīnoñ se ham ne nok kī lī

guloñ kī aañkh meñ khaTke vo ḳhaar ham bhī haiñ

ajiib rutba ināyat kiyā hai qambar ko

ġhulām yā shah-e-duldul-savār ham bhī haiñ

junūñ ke haath se hai in dinoñ garebāñ tañg

qabā pukārtī hai taar taar ham bhī haiñ

baḌe hī chāliye haiñ chaal chalte haiñ har dam

vo chūkte nahīñ par hoshiyār ham bhī haiñ

raqīb ko bhī hai baar un kī bazm meñ 'āġhā'

sharīk-e-sohbat-e-bos-o-kanār ham bhī haiñ

hazar jaan se sahab nisar hum bhi hain

tumhaari tir-e-nigah ke shikar hum bhi hain

azal se daKHil-e-fard-e-shumar hum bhi hain

tumhaare chahne walon mein yar hum bhi hain

hamesha hum se kudurat rahi hasinon ko

na dil se nikle kabhi wo ghubar hum bhi hain

musafiron ki tawazo se nam hota hai

karam karo ki gharib-ud-dayar hum bhi hain

sharab pite hain to jagte hain sari raat

mudam aabid-e-shab-zinda-dar hum bhi hain

hazar bar hasinon se hum ne nok ki li

gulon ki aankh mein khaTke wo KHar hum bhi hain

ajib rutba inayat kiya hai qambar ko

ghulam ya shah-e-duldul-sawar hum bhi hain

junun ke hath se hai in dinon gareban tang

qaba pukarti hai tar tar hum bhi hain

baDe hi chaaliye hain chaal chalte hain har dam

wo chukte nahin par hoshiyar hum bhi hain

raqib ko bhi hai bar un ki bazm mein 'agha'

sharik-e-sohbat-e-bos-o-kanar hum bhi hain