hazaron bar kah kar bewafa ko ba-wafa maine

hazāroñ baar kah kar bevafā ko bā-vafā maiñ ne

batāyā hai zamāne ko vafā kā rāsta maiñ ne

baḌī izzat se ahl-e-jurm merā naam lete haiñ

gunahgāroñ ko ik din kah diyā thā pārsā maiñ ne

tum apne aap ko kuchh bhī kaho maz.hab ke dīvāno

na dekhā koī tum jaisā ḳhudā-nā-āshnā maiñ ne

jalā kar zulmat-e-bātil meñ haq kī mish.aleñ yaaro

zamāne ko banāyā hai haqīqat-āshnā maiñ ne

ġharaz dair o haram se hai na matlab hai kalīsā se

jahāñ jalva nazar aayā tirā sajda kiyā maiñ ne

bahut hī mo'tabar huuñ kyuuñ ki maiñ raahī huuñ ai 'rāhī'

qasam le lo agar ḳhud ko kahā ho rahnumā maiñ ne

hazaron bar kah kar bewafa ko ba-wafa main ne

bataya hai zamane ko wafa ka rasta main ne

baDi izzat se ahl-e-jurm mera nam lete hain

gunahgaron ko ek din kah diya tha parsa main ne

tum apne aap ko kuchh bhi kaho mazhab ke diwano

na dekha koi tum jaisa KHuda-na-ashna main ne

jala kar zulmat-e-baatil mein haq ki mishalen yaro

zamane ko banaya hai haqiqat-ashna main ne

gharaz dair o haram se hai na matlab hai kalisa se

jahan jalwa nazar aaya tera sajda kiya main ne

bahut hi mo'tabar hun kyun ki main rahi hun ai 'rahi'

qasam le lo agar KHud ko kaha ho rahnuma main ne