hazaron dard yakja ho ke aankhen dho rahe hain

hazāroñ dard yakjā ho ke āñkheñ dho rahe haiñ

ye rut girya kī hai har samt aañsū ho rahe haiñ

havā-e-ḳhvāb-e-ḳhush ne thī hamārī niiñd toḌī

so ik gahrī udāsī oḌh lī hai so rahe haiñ

hameñ rakhne the apne naqsh-e-pā bhī surḳhiyoñ meñ

so apnī raah meñ kuchh aur kāñTe bo rahe haiñ

baḌī ḳhvāhish thī ham ko qais hone kī so ho ga.e

na jaane kab se sar par ek sahrā Dho rahe haiñ

kahānī bhī tumhārī aur aham kirdār bhī tum

hamārā zikr kyā ham jo rahe haiñ so rahe haiñ

achānak ḳhāmushī se bhar ga.e haiñ sab vagarna

zamāne tak hamāre zaḳhm qissa-go rahe haiñ

ajab sī bad-havāsī hai hameñ koī batā.e

hameñ kyā DhūñDhnā hai aur ham kyā kho rahe haiñ

zarā sambhlo tumhārī vahshatoñ ke zikr 'salmān'

jahāñ hone nahīñ the ab vahāñ bhī ho rahe haiñ

hazaron dard yakja ho ke aankhen dho rahe hain

ye rut girya ki hai har samt aansu ho rahe hain

hawa-e-KHwab-e-KHush ne thi hamari nind toDi

so ek gahri udasi oDh li hai so rahe hain

hamein rakhne the apne naqsh-e-pa bhi surKHiyon mein

so apni rah mein kuchh aur kanTe bo rahe hain

baDi KHwahish thi hum ko qais hone ki so ho gae

na jaane kab se sar par ek sahra Dho rahe hain

kahani bhi tumhaari aur aham kirdar bhi tum

hamara zikr kya hum jo rahe hain so rahe hain

achanak KHamushi se bhar gae hain sab wagarna

zamane tak hamare zaKHm qissa-go rahe hain

ajab si bad-hawasi hai hamein koi batae

hamein kya DhunDhna hai aur hum kya kho rahe hain

zara sambhlo tumhaari wahshaton ke zikr 'salman'

jahan hone nahin the ab wahan bhi ho rahe hain