hazaron ranj-o-gham de kar KHushi ki baat karte hain

hazāroñ ranj-o-ġham de kar ḳhushī kī baat karte haiñ

hai ḳhanjar āstīñ meñ dostī kī baat karte haiñ

paḌeñ chhāle zabāñ par ġhair kā jo naam bhī le leñ

ki ham to aap ke haiñ aap hī kī baat karte haiñ

samajh meñ kuchh nahīñ aatā haiñ dīvāne ki farzāne

ḳhudī meñ jī rahe haiñ be-ḳhudī kī baat karte haiñ

koī ham sā na hogā pyaar kā maarā zamāne meñ

samundar pī chuke aur tishnagī kī baat karte haiñ

jo ḳhud vāqif nahīñ haiñ zindagānī kī haqīqat se

vahī ham se usūl-e-zindagī kī baat karte haiñ

junūñ-parvarda logoñ meñ junūñ kī baat hotī hai

ḳhirad ke pāsbāñ to āgahī kī baat karte haiñ

kiyā karte haiñ murda-dil hamesha maut kī bāteñ

jo zinda-dil haiñ vo to zindagī kī baat karte haiñ

hazaron ranj-o-gham de kar KHushi ki baat karte hain

hai KHanjar aastin mein dosti ki baat karte hain

paDen chhaale zaban par ghair ka jo nam bhi le len

ki hum to aap ke hain aap hi ki baat karte hain

samajh mein kuchh nahin aata hain diwane ki farzane

KHudi mein ji rahe hain be-KHudi ki baat karte hain

koi hum sa na hoga pyar ka mara zamane mein

samundar pi chuke aur tishnagi ki baat karte hain

jo KHud waqif nahin hain zindagani ki haqiqat se

wahi hum se usul-e-zindagi ki baat karte hain

junun-parwarda logon mein junun ki baat hoti hai

KHirad ke pasban to aagahi ki baat karte hain

kiya karte hain murda-dil hamesha maut ki baaten

jo zinda-dil hain wo to zindagi ki baat karte hain