hijab-e-ganj-e-maKHfi mein nihan the

hijāb-e-ganj-e-maḳhfī meñ nihāñ the

ilāhī ham kahāñ aa.e kahāñ the

kisī ne bhī na dekhā ham jahāñ the

badan the ḳhalq ham mānind-e-jāñ the

basān-e-nāla sar khīñchā hai bāhar

ham ahl-e-dard ke dil meñ nihāñ the

nikālā karte the bāloñ kī khāleñ

kabhī ham bhī ḳhayāl-e-shā.irāñ the

rahe raste meñ qadmoñ se chipat kar

magar ham naqsh-e-pā-e-raftagāñ the

jab us kūche kī hāsil thī gadā.ī

ḳhudā-vand-e-zamīn-o-āsmāñ the

hue zāhir basān-e-nūr-e-bātin

dil-e-arbāb dil meñ ham nihāñ the

tire kūche meñ jab chalnā paḌā thā

basān-e-ashk āñkhoñ se ravāñ the

kuchh aise nashsha-e-hastī se bahke

nahīñ jaanā kahāñ aa.e kahāñ the

sarāpā dard the mānind-e-dil ham

maraz the par nasīb-e-dostāñ the

kahāñ baat us kī ulfat kī kahāñ dil

ye dirham ganj-e-maḳhfī meñ nihāñ the

na dauḌe juz sivā.e kūcha-e-yār

magar ham bhī ḳhayāl-e-dostāñ the

na kyuuñ sayyād vaqt-e-marg aatā

ki ham bāġh-e-jahāñ meñ murġh-e-jāñ the

na hargiz bazm-e-sāqī meñ ruke ham

magar daur-e-sharāb-e-arġhavāñ the

hamā.il the gulū-e-duḳht-e-raz meñ

ke ham dast-e-ḳhayāl-e-maikashāñ the

rahī rātoñ ko aksar sair-e-aflāk

magar ham tīr-e-āh-e-be-kasāñ the

kahāñ Daalā ḳhalal wasl-e-adūain

gajar hī the na ham bāñg-e-azāñ the

bahār-e-bāġh hastī thī hamīñ se

nazar se go ba-rañg-e-bū nihāñ the

ayaañ aise ke har shai meñ nihāñ ham

nihāñ aise ki har shai se ayaañ the

na thā māshūq jis meñ ġhair-e-āshiq

ajab ḳhalvat thī vo bhī ham jahāñ the

uThe ham uTh gayā pardā duī kā

hamāre us ke bas ham darmiyāñ the

chaleñ zer-e-zamīñ be bāl-o-par aaj

kabhī ham tā.ir-e-arsh-āshiyāñ the

na shukr us kā kiyā talvār khā kar

ki zaḳhm apne dahān-e-be zabāñ the

kuchh aisī thī shab-e-ġham kī chaḌhā.ī

ki naale sham.a-e-bazm-e-lamākāñ the

ga.e vo din ke har-dam ye jigar dil

lahū ban ban ke āñkhoñ se ravāñ the

na rahte the Thikāne ek saa.at

kabhī ham bhī havās-e-āshiqāñ the

gulistān-e-jahāñ meñ kaun Thahrā

jo sarv aa.e nazar sarv-e-ravāñ the

ḳhudā ne un ko pahuñchāyā hadaf tak

ḳhadañg-e-āh tīr-e-be-kamāñ the

jo us mahfil meñ ham jaane bhī paa.e

piyā-pe aañsū āñkhoñ se ravāñ the

na niklī baat muñh se sūr-e-sham.a

zabān aisī thī goyā be-zabāñ the

mere pahlū meñ kal baiThe the aasī

magar jab tak the misl-e-dil tapāñ the

hijab-e-ganj-e-maKHfi mein nihan the

ilahi hum kahan aae kahan the

kisi ne bhi na dekha hum jahan the

badan the KHalq hum manind-e-jaan the

basan-e-nala sar khincha hai bahar

hum ahl-e-dard ke dil mein nihan the

nikala karte the baalon ki khaalen

kabhi hum bhi KHayal-e-shairan the

rahe raste mein qadmon se chipat kar

magar hum naqsh-e-pa-e-raftagan the

jab us kuche ki hasil thi gadai

KHuda-wand-e-zamin-o-asman the

hue zahir basan-e-nur-e-baatin

dil-e-arbab dil mein hum nihan the

tere kuche mein jab chalna paDa tha

basan-e-ashk aankhon se rawan the

kuchh aise nashsha-e-hasti se bahke

nahin jaana kahan aae kahan the

sarapa dard the manind-e-dil hum

maraz the par nasib-e-dostan the

kahan baat us ki ulfat ki kahan dil

ye dirham ganj-e-maKHfi mein nihan the

na dauDe juz siwae kucha-e-yar

magar hum bhi KHayal-e-dostan the

na kyun sayyaad waqt-e-marg aata

ki hum bagh-e-jahan mein murgh-e-jaan the

na hargiz bazm-e-saqi mein ruke hum

magar daur-e-sharab-e-arghawan the

hamail the gulu-e-duKHt-e-raz mein

ke hum dast-e-KHayal-e-maikashan the

rahi raaton ko aksar sair-e-aflak

magar hum tir-e-ah-e-be-kasan the

kahan Dala KHalal wasl-e-aduain

gajar hi the na hum bang-e-azan the

bahaar-e-bagh hasti thi hamin se

nazar se go ba-rang-e-bu nihan the

ayan aise ke har shai mein nihan hum

nihan aise ki har shai se ayan the

na tha mashuq jis mein ghair-e-ashiq

ajab KHalwat thi wo bhi hum jahan the

uThe hum uTh gaya parda dui ka

hamare us ke bas hum darmiyan the

chalen zer-e-zamin be baal-o-par aaj

kabhi hum tair-e-arsh-ashiyan the

na shukr us ka kiya talwar kha kar

ki zaKHm apne dahan-e-be zaban the

kuchh aisi thi shab-e-gham ki chaDhai

ki nale shama-e-bazm-e-lamakan the

gae wo din ke har-dam ye jigar dil

lahu ban ban ke aankhon se rawan the

na rahte the Thikane ek saat

kabhi hum bhi hawas-e-ashiqan the

gulistan-e-jahan mein kaun Thahra

jo sarw aae nazar sarw-e-rawan the

KHuda ne un ko pahunchaya hadaf tak

KHadang-e-ah tir-e-be-kaman the

jo us mahfil mein hum jaane bhi pae

piya-pe aansu aankhon se rawan the

na nikli baat munh se sur-e-shama

zaban aisi thi goya be-zaban the

mere pahlu mein kal baiThe the aasi

magar jab tak the misl-e-dil tapan the