hijr-e-jaanan mein ji se jaana hai

hijr-e-jānāñ meñ jī se jaanā hai

bas yahī maut kā bahāna hai

kyuuñ na barsā.eñ ashk dīda-e-tar

ātish-e-ishq kā bujhānā hai

ho adū jis pe kījiye ehsān

kuchh ajab tarah kā zamāna hai

yaad dilvā ke dāstān-e-visāl

āshiq-e-zār ko rulānā hai

rakh dilā roz-o-shab umīd-e-visāl

rañj-e-furqat agar bhulānā hai

jaan jaatī hai jis jagah sab kī

usī kūche meñ apnā jaanā hai

koī dam meñ adam ko huuñ raahī

aa agar tujh ko ab bhī aanā hai

ḳhāk-sārī na chhoḌnā 'ra.anā'

ek din ḳhaak hī meñ jaanā hai

hijr-e-jaanan mein ji se jaana hai

bas yahi maut ka bahana hai

kyun na barsaen ashk dida-e-tar

aatish-e-ishq ka bujhana hai

ho adu jis pe kijiye ehsan

kuchh ajab tarah ka zamana hai

yaad dilwa ke dastan-e-visal

aashiq-e-zar ko rulana hai

rakh dila roz-o-shab umid-e-visal

ranj-e-furqat agar bhulana hai

jaan jati hai jis jagah sab ki

usi kuche mein apna jaana hai

koi dam mein adam ko hun rahi

aa agar tujh ko ab bhi aana hai

KHak-sari na chhoDna 'rana'

ek din KHak hi mein jaana hai