hijr ki dhup mein chaon jaisi baaten karte hain

hijr kī dhuup meñ chāoñ jaisī bāteñ karte haiñ

aañsū bhī to maaoñ jaisī bāteñ karte haiñ

rasta dekhne vaalī āñkhoñ ke anhone-ḳhvāb

pyaas meñ bhī dariyāoñ jaisī bāteñ karte haiñ

ḳhud ko bikharte dekhte haiñ kuchh kar nahīñ paate haiñ

phir bhī log ḳhudāoñ jaisī bāteñ karte haiñ

ek zarā sī jot ke bal par añdhiyāroñ se bair

pāgal diye havāoñ jaisī bāteñ karte haiñ

rang se ḳhushbūoñ kā naatā TūTtā jaatā hai

phuul se log ḳhizāoñ jaisī bāteñ karte haiñ

ham ne chup rahne kā ahd kiyā hai aur kam-zarf

ham se suḳhan-ārāoñ jaisī bāteñ karte haiñ

hijr ki dhup mein chaon jaisi baaten karte hain

aansu bhi to maon jaisi baaten karte hain

rasta dekhne wali aankhon ke anhone-KHwab

pyas mein bhi dariyaon jaisi baaten karte hain

KHud ko bikharte dekhte hain kuchh kar nahin pate hain

phir bhi log KHudaon jaisi baaten karte hain

ek zara si jot ke bal par andhiyaron se bair

pagal diye hawaon jaisi baaten karte hain

rang se KHushbuon ka nata TuTta jata hai

phul se log KHizaon jaisi baaten karte hain

hum ne chup rahne ka ahd kiya hai aur kam-zarf

hum se suKHan-araon jaisi baaten karte hain