hijr ki raaten kaise kaTen puchho hijr ke maron se

hijr kī rāteñ kaise kāTeñ pūchho hijr ke māroñ se

palkoñ palkoñ ashk sajā.e bāteñ kiiñ dīvāroñ se

jīvan nayyā juujh rahī hai zulm ke bahte dhāroñ se

ham ne kyā kyā dard sameTe rozāna aḳhbāroñ se

āñgan āñgan phuul khileñge pyaar kī ḳhushbū mahkegī

amn kā parcham hāthoñ meñ leñ kaam na leñ talvāroñ se

nazm-e-zamāna darham-o-barham ab to aisā lagtā hai

rāhzanoñ kā ḳhauf hai kam-kam Dar hai pahre-dāroñ se

jahd-o-amal kā dāman thāmeñ azm kā parcham lahrā.eñ

kashtī paar nahīñ lagtī hai bātoñ kī patvāroñ se

yaaro jism kī ḳhush-poshī se taz.īn-o-tauqīr nahīñ

dil ko bhī to raushan kiije pākīza afkāroñ se

mere vatan kī miTTī meñ bhī yaaro kitnī ḳhūbī hai

soñdhī soñdhī ḳhushbū mahke bārish kī bauchhāroñ se

hijr ki raaten kaise kaTen puchho hijr ke maron se

palkon palkon ashk sajae baaten kin diwaron se

jiwan nayya jujh rahi hai zulm ke bahte dhaaron se

hum ne kya kya dard sameTe rozana aKHbaron se

aangan aangan phul khilenge pyar ki KHushbu mahkegi

amn ka parcham hathon mein len kaam na len talwaron se

nazm-e-zamana darham-o-barham ab to aisa lagta hai

rahzanon ka KHauf hai kam-kam Dar hai pahre-daron se

jahd-o-amal ka daman thamen azm ka parcham lahraen

kashti par nahin lagti hai baaton ki patwaron se

yaro jism ki KHush-poshi se tazin-o-tauqir nahin

dil ko bhi to raushan kije pakiza afkaron se

mere watan ki miTTi mein bhi yaro kitni KHubi hai

sondhi sondhi KHushbu mahke barish ki bauchhaaron se