hijr-nama paDhte paDhte dastan ho jaunga

hijr-nāma paḌhte paḌhte dāstāñ ho jā.uñgā

ek din maiñ bhī sharīk-e-kārvāñ ho jā.uñgā

bā-zabāñ hote hue bhī be-zabāñ ho jā.uñgā

dil se chāho to tumhārā rāzdāñ ho jā.uñgā

bā’d-az-tārāj maiñ ne ye kabhī sochā na thā

phir kisī gul se milūñgā gulsitāñ ho jā.uñgā

tum kisī vā'iz ke chakkar meñ judā ho jāogī

maiñ kisī be-sur muazzin kī azaañ ho jā.uñgā

thaam kar hāthoñ meñ apne vaqt kī baisākhiyāñ

manzil-e-maqsūd kī jānib ravāñ ho jā.uñgā

mutma.in rahnā paḌegā par nikalne tak mujhe

gar abhī niklā qafas se be-amāñ ho jā.uñgā

tīrgī kī sāzisheñ nākām karne ke liye

sub.h-e-sādiq shams kī sūrat 'ayāñ ho jā.uñgā

gar yūñhī lipTā rahā maiñ kākul-e-ḳhamdār se

aag bujhte hī mohabbat kī dhuāñ ho jā.uñgā

muskurāne kī agar mohlat bhī dī jaa.e mujhe

is qadar majbūr huuñ girya-kunāñ ho jā.uñgā

ai parī-zādī mire andām kā rā’sha na dekh

sabr gar TuuTā za’īfī meñ javāñ ho jā.uñgā

log sīkheñge mire marne se jiine kā hunar

maiñ pa.e-'ushshāq 'ibrat kā nishāñ ho jā.uñgā

maiñ tirī jalvagarī kī taab lā saktā nahīñ

misl-e-mūsā luqma-e-barq-e-tapāñ ho jā.uñgā

fā'ilātun fā'ilātun fā'ilātun fā’ilun

ye ravish jaarī rahī to jāvedāñ ho jā.uñgā

maut kī hasrat banegī āḳhirī chāra merā

jab mohabbat ke safar meñ nīm-jāñ ho jā.uñgā

jab bhī āzādī milegī gardish-e-ayyām se

maiñ bhī 'mehvar' 'āshiq-e-bint-e-fulāñ ho jā.uñgā

hijr-nama paDhte paDhte dastan ho jaunga

ek din main bhi sharik-e-karwan ho jaunga

ba-zaban hote hue bhi be-zaban ho jaunga

dil se chaho to tumhaara raazdan ho jaunga

ba’d-az-taraj main ne ye kabhi socha na tha

phir kisi gul se milunga gulsitan ho jaunga

tum kisi wa'iz ke chakkar mein juda ho jaogi

main kisi be-sur muazzin ki azan ho jaunga

tham kar hathon mein apne waqt ki baisakhiyan

manzil-e-maqsud ki jaanib rawan ho jaunga

mutmain rahna paDega par nikalne tak mujhe

gar abhi nikla qafas se be-aman ho jaunga

tirgi ki sazishen nakaam karne ke liye

subh-e-sadiq shams ki surat 'ayan ho jaunga

gar yunhi lipTa raha main kakul-e-KHamdar se

aag bujhte hi mohabbat ki dhuan ho jaunga

muskurane ki agar mohlat bhi di jae mujhe

is qadar majbur hun girya-kunan ho jaunga

ai pari-zadi mere andam ka ra’sha na dekh

sabr gar TuTa za’ifi mein jawan ho jaunga

log sikhenge mere marne se jine ka hunar

main pae-'ushshaq 'ibrat ka nishan ho jaunga

main teri jalwagari ki tab la sakta nahin

misl-e-musa luqma-e-barq-e-tapan ho jaunga

fa'ilatun fa'ilatun fa'ilatun fa’ilun

ye rawish jari rahi to jawedan ho jaunga

maut ki hasrat banegi aaKHiri chaara mera

jab mohabbat ke safar mein nim-jaan ho jaunga

jab bhi aazadi milegi gardish-e-ayyam se

main bhi 'mehwar' 'ashiq-e-bint-e-fulan ho jaunga