hijr-o-visal-e-yar ka parda uTha diya

hijr-o-visāl-e-yār kā parda uThā diyā

ḳhud baḌh ke ishq ne mujhe merā patā diyā

gard-o-ġhubār-e-hastī-e-fānī uḌā diyā

ai kīmiyā-e-ishq mujhe kyā banā diyā

vo sāmne hai aur nazar se chhupā diyā

ai ishq-e-be-hijāb mujhe kyā dikhā diyā

vo shān-e-ḳhāmushī ki bahāreñ haiñ muntazir

vo rañg-e-guftugū ki gulistāñ banā diyā

dam le rahī thiiñ husn kī jab sehr-kāriyāñ

in vaqfa-hā-e-kufr ko īmāñ banā diyā

ma.alūm kuchh mujhī ko haiñ un kī ravāniyāñ

jin qatra-hā-e-ashk ko dariyā banā dayā

ik barq-e-be-qarār thī tamkīn-e-husn bhī

jis vaqt ishq ko ġham-e-sabr-āzmā diyā

saaqī mujhe bhī yaad haiñ vo tishna-kāmiyāñ

jin ko harīf-e-sāġhar-o-mīnā banā diyā

ma.alūm hai haqīqat-e-ġham-hā-e-rozgār

duniyā ko tere dard ne duniyā banā diyā

ai shoḳhi-e-nigāh-e-karam muddatoñ ke ba.ad

ḳhvāb-e-girān-e-ġham se mujhe kyuuñ jagā diyā

kuchh shorisheñ taġhāful-e-pinhāñ meñ thiiñ jinheñ

hañgāma-zār-e-hashr-e-tamannā banā diyā

baḌhtā hī jā rahā hai jamāl-e-nazar-fareb

husn-e-nazar ko husn-e-ḳhud-ārā banā diyā

phir dekhnā nigāh laḌī kis se ishq kī

gar husn ne hijāb-e-taġhāful uThā diyā

jab ḳhuun ho chukā dil-e-hastī-e-etibār

kuchh dard bach rahe jinheñ insāñ banā diyā

gum-karda-e-vafūr-e-ġham-e-intizār huuñ

tū kyā chhupā ki mujh ko mujhī se chhupā diyā

raat ab harīf-e-sub.h-e-qayāmat hī kyuuñ na ho

jo kuchh bhī ho us aañkh ko ab to jagā diyā

ab maiñ huuñ aur lutf-o-karam ke takallufāt

ye kyuuñ hijāb-e-ranjish-e-be-jā banā diyā

thī yuuñ to shām-e-hijr magar pichhlī raat ko

vo dard uThā 'firāq' ki maiñ muskurā diyā

hijr-o-visal-e-yar ka parda uTha diya

KHud baDh ke ishq ne mujhe mera pata diya

gard-o-ghubar-e-hasti-e-fani uDa diya

ai kimiya-e-ishq mujhe kya bana diya

wo samne hai aur nazar se chhupa diya

ai ishq-e-be-hijab mujhe kya dikha diya

wo shan-e-KHamushi ki bahaaren hain muntazir

wo rang-e-guftugu ki gulistan bana diya

dam le rahi thin husn ki jab sehr-kariyan

in waqfa-ha-e-kufr ko iman bana diya

malum kuchh mujhi ko hain un ki rawaniyan

jin qatra-ha-e-ashk ko dariya bana daya

ek barq-e-be-qarar thi tamkin-e-husn bhi

jis waqt ishq ko gham-e-sabr-azma diya

saqi mujhe bhi yaad hain wo tishna-kaamiyan

jin ko harif-e-saghar-o-mina bana diya

malum hai haqiqat-e-gham-ha-e-rozgar

duniya ko tere dard ne duniya bana diya

ai shoKHi-e-nigah-e-karam muddaton ke baad

KHwab-e-giran-e-gham se mujhe kyun jaga diya

kuchh shorishen taghaful-e-pinhan mein thin jinhen

hangama-zar-e-hashr-e-tamanna bana diya

baDhta hi ja raha hai jamal-e-nazar-fareb

husn-e-nazar ko husn-e-KHud-ara bana diya

phir dekhna nigah laDi kis se ishq ki

gar husn ne hijab-e-taghaful uTha diya

jab KHun ho chuka dil-e-hasti-e-etibar

kuchh dard bach rahe jinhen insan bana diya

gum-karda-e-wafur-e-gham-e-intizar hun

tu kya chhupa ki mujh ko mujhi se chhupa diya

raat ab harif-e-subh-e-qayamat hi kyun na ho

jo kuchh bhi ho us aankh ko ab to jaga diya

ab main hun aur lutf-o-karam ke takallufat

ye kyun hijab-e-ranjish-e-be-ja bana diya

thi yun to sham-e-hijr magar pichhli raat ko

wo dard uTha 'firaq' ki main muskura diya