hijr tanhai ke lamhon mein bahut bolta hai

hijr tanhā.ī ke lamhoñ meñ bahut boltā hai

rang is kā ka.ī rañgoñ meñ bahut boltā hai

maiñ use chup ke havāle se bhī kaise likkhūñ

vo to aisā hai ki harfoñ meñ bahut boltā hai

ek lau hai ki sar-e-bām thiraktī hai bahut

ik diyā hai ki darīchoñ meñ bahut boltā hai

apnī āvāz sunā.ī nahīñ detī mujh ko

ek sannāTā ki galiyoñ meñ bahut boltā hai

ek hī lai se hai mānūs mirā tār-e-nafas

ek hī sar mere kānoñ meñ bahut boltā hai

chaaT letī hai mirā jism mire peḌ kī dhuup

merā saaya bure vaqtoñ meñ bahut boltā hai

aksar auqāt mirī zaat kā ik ḳhālī-pan

merī TuuTī huī chīzoñ meñ bahut boltā hai

dil mirā us kī tarah phuul ke mānind hai 'qais'

jo mirī band kitāboñ meñ bahut boltā hai

hijr tanhai ke lamhon mein bahut bolta hai

rang is ka kai rangon mein bahut bolta hai

main use chup ke hawale se bhi kaise likkhun

wo to aisa hai ki harfon mein bahut bolta hai

ek lau hai ki sar-e-baam thirakti hai bahut

ek diya hai ki darichon mein bahut bolta hai

apni aawaz sunai nahin deti mujh ko

ek sannaTa ki galiyon mein bahut bolta hai

ek hi lai se hai manus mera tar-e-nafas

ek hi sar mere kanon mein bahut bolta hai

chaT leti hai mera jism mere peD ki dhup

mera saya bure waqton mein bahut bolta hai

aksar auqat meri zat ka ek KHali-pan

meri TuTi hui chizon mein bahut bolta hai

dil mera us ki tarah phul ke manind hai 'qais'

jo meri band kitabon mein bahut bolta hai