hisar-e-kasa-e-sar toD kar nikal aae

hisār-e-kāsa-e-sar toḌ kar nikal aa.e

talab huī thī to sajdoñ ke par nikal aa.e

har ik zamīr se parda uThā ga.e patthar

kisī ke aib kisī ke hunar nikal aa.e

sañvar sañvar ke mashiyyat sañvārtī hai jinheñ

idhar to koī nahīñ ham kidhar nikal aa.e

mirā ḳharosh-e-junūñ jab bhī rañg-pāsh huā

mirī taraf nigarāñ kitne dar nikal aa.e

kahāñ hai holī jo dekhe ba-yak-karishma do-kār

ghire the aag meñ ham bhī magar nikal aa.e

ba-īñ-nazākat-e-taḳhlīq Thokareñ khāne

ye pattharoñ meñ kahāñ shīshagar nikal aa.e

farāz-e-manzil-e-raf-raf savārgī saugand

ḳhalā meñ aur basīrat ke par nikal aa.e

lab-e-furāt ajab shān-e-sarfarāzī thī

gumāñ thā dasht meñ nezoñ ke sar nikal aa.e

hai āgahī bhī agar jāñ-gusil to ho 'ġhausī'

harīm-e-be-ḳhabarī se magar nikal aa.e

hisar-e-kasa-e-sar toD kar nikal aae

talab hui thi to sajdon ke par nikal aae

har ek zamir se parda uTha gae patthar

kisi ke aib kisi ke hunar nikal aae

sanwar sanwar ke mashiyyat sanwarti hai jinhen

idhar to koi nahin hum kidhar nikal aae

mera KHarosh-e-junun jab bhi rang-pash hua

meri taraf nigaran kitne dar nikal aae

kahan hai holi jo dekhe ba-yak-karishma do-kar

ghire the aag mein hum bhi magar nikal aae

ba-in-nazakat-e-taKHliq Thokaren khane

ye pattharon mein kahan shishagar nikal aae

faraaz-e-manzil-e-raf-raf sawargi saugand

KHala mein aur basirat ke par nikal aae

lab-e-furaat ajab shan-e-sarfaraazi thi

guman tha dasht mein nezon ke sar nikal aae

hai aagahi bhi agar jaan-gusil to ho 'ghausi'

harim-e-be-KHabari se magar nikal aae